...hmmm

2008-05-29T09:50:00.002Z

Þessa stundina ætti ég að vera stödd í flugstöðinni á leið til Spánar. Það er búið að breyta flugtímanum okkar 4 sinnum og núna er einhver bilun í vél, þannig að flugið okkar sem átti að vera 11:30 eftir síðustu breytingar er núna áætlað kl. 18:35. ...og já, ÁÆTLAÐ! það er ekki komin staðfesting þannig að því seinkar nú líklega meira. Það er einmitt líka búið að seinka Alicantevélinni frá því í gær, og mig grunar að sú vél eigi eftir að fljúga út til Alecante og til baka aftur að sækja okkur þegar búið er að gera við hana.

Ég, Ari, Halldór og Eva ætlum að fara á Kringlukránna í hádeginu og ímynda okkur að við séum á Spáni :D

2008-05-18T16:46:00.002Z

hahaha, hvað ég hló áðan. Urður kom spígsporandi hérna inn eftir að hafa verið úti með Ynju og tilkynnti okkur hróðug með bros á vör að þær hefðu verið að éta hundaskít :D
...þetta var næstum því rétt, en gott að segja kannski frá því að þetta voru hundaSÚRUR sem þær systur voru að éta ;)

2008-05-17T16:20:00.002Z

Dagurinn í dag hófst með rigningarferð í húsdýragarðinn. Ég man alltaf þegar ég er komin á svona fjöldasamkomur að mér finnst fátt ömurlegra en að standa í biðröðum, krakkagreyin fengu þessvegna ekki að fara í nein tæki (sem þeim fannst reyndar allt í lagi), en við fórum reyndar í pulsuröðina til að fá blauta og klessta pulsu ...ojbara! Urði fannst gaman að skoða dýrin þannig að ferðin var nú ekki alveg til einskis ;)
Svo fórum við í Salinn í Kópavogi þar sem Ynja var að syngja með kór Kársnesskóla. Alveg dásamlegt að horfa á þessar elskur, allar svo sætar og góðar með fallegar englaraddir. Bakkelsið í salnum var nú eitthvað annað en klesstu pulsurnar í Húsdýragarðinum - enda færustu húsmæðurnar í vesturbæ Kópavogs að sjá um baksturinn, þar á meðal ég, hehe ;)
Urði fannst rosalega gaman á tónleikunum. Fyrst var hún svolítið þreytt og notaði puttan á pabba sínum til að troða í nefið á sér, af því að sængin var ekki á svæðinu. En eftir því sem lögin hresstust, hresstist Urður líka og var á endanum farin að hendast um allan salinn dillandi bossanum og hoppandi eins og lína langsokkur með tvær rauðar fléttur sem stóðu út í loftið. - en það var nú í góðu lagi, þetta voru svona frjálslegir tónleikar og maður þarf ekkert að vera stilltur á svoleiðis :)

2008-05-12T14:49:00.002Z

Ég biðst afsökunar á mjög löngu blogg-hléi :)
Ég hef bara verið alveg á fullu í prófum og ritgerðarskilum. Allan tíman hef ég verið mjög óviss um hvort mér tækist að klára þessar 19 einingar, en ég er nokkuð viss um að það hafi tekist :D ...sem þýðir þá að ég er að útskrifast þann 14.júní.
Við fórum út að borða á laugardaginn á Sjávarkjallarann ...og jeminn, ég fer bara að slefa þegar ég hugsa um það. Við fengum 16 rétta máltið og vááá hvað þetta var gott. Við borðuðum meðal annars hreindýr, naut, önd, kengúru, lax, túnfisk, smálúðu, humar, skelfisk, saltfisk ...og eitthvað fleira, þó ótrúlegt sé! Við Ari skelltum okkur þarna með Halldóri frænda og Evu, sem er konan hans, og Hrund frænku minni, það er ekki hægt að biðja um betri félagsskap við að slafra í sig svona dásamlegum mat :)
...svo er svo margt spennandi framundan, ég byrja í nýrri vinnu á morgunn, fer til spánar eftir rétt rúmar tvær vikur, ásamt áðurnefndum Halldóri og Evu, og svo bara útskrift!
Ástæðan fyrir því að ég er að blogga núna er sú að mér finnst eins og ég hafi ekkert að gera, ég þarf ekki að læra, ég er búin að þrífa allt, Ari og Óðinn eru á bílasýningu og ég er bara hérna heima með ekkert betra að gera en fylgjast með þessum 7 stelpum sem eru hérna núna - mínar tvær og fimm aðrar.
Ég þarf kannski að fara að rifja upp gömul áhugamál eins og að baka eða sauma út, hehe.

2008-02-14T13:17:00.003Z

Ég er orðin stökkmúsamamma. Stökkmúsakerlingin okkar eignaðist unga í nótt. Ég held að þeir séu 5 talsins, annars er ég ekki búin að sjá þá nógu vel. Músamamman er á fullu að laga bælið og passa litlu ungana sína.
Það er alveg ótrúlegt að þetta geti orðið til á aðeins 3 vikum!

Þannig að ...ef einhvern vantar stökkmýs, þá er ég rétta manneskjan til að tala við.
Smá upplýsingar um stökkmýs: stökkmýs eru afskaplega skemmtileg dýr - mun skemmtilegri en hamstrar, ég hef átt svoleiðis líka. Þær eru alltaf á fullu að forvitnast og gera eitthvað, grafa eða vinna. Það er ekkert mál að halda á þeim, þær eru ekki að stökkva frá manni eins og nafnið gefur til kynna, heldur finnst þeim gaman að troða sér á milli puttanna á manni. Þær elska sólblómafræ. Þær hlaupa EKKI í hlaupahjóli ...sem þýðir enginn hávaði á nóttunni. Þær eru vakandi á daginn - ekki sofandi og í felum eins og hamstrar. Það kemur ekki vond lykt af þeim - eins og gerist hjá hömstrum.
Semsagt, ef þið hafið verið að hugsa um að fá ykkur hamstur, fáið ykkur þá frekar stökkmús :D Þær eru miklu sætari og skemmtilegri :)

2008-01-30T20:53:00.000Z

Nú er skoffínið orðið tveggja og hálfs árs og er stöðugt að læra nýja hluti. Það vill nú þannig til að skvísan er ennþá með bleyju og hefur ekki sýnt mikinn áhuga á því að hætta, þrátt fyrir að vita nákvæmlega hvenær hún þarf að nota hana. Ef undarleg lykt fer að finnast í húsinu og grunur beinist að henni, þá neitar hún staðfastlega og snýr rassinum út í horn, eða hleypur inn í skáp og lokar. Í svoleiðis stöðu þarf maður að afla frekari sönnunargagna, og felst það oftar en ekki í því að maður þarf að beygja sig niður og ganga úr skugga um uppruna óþefjarins!

Börn læra ýmislegt af foreldrum sínum. Undanfarið hefur skoffínið því farið að rjúka á fólk og lykta af rassinum á því ef hún finnur grunsamlega lykt eða hljóð sem bendir til þess að eitthvað grunsamlegt hafi átt sér stað.
Þetta getur boðið upp á frekar vandræðaleg augnablik.

Ókei! Af því að þessi staða var komin upp ákvað ég að nú yrði bara að fara að venja hana af bleyjunni. Þessvegna tók ég bleyjuna af henni seinnipartinn í dag og sagði við hana að nú þyrfti hún að fara að hætta með bleyjuna og nota nærbuxur, eins og Ynja og Óðinn.

...ég var ekki fyrr búin að því en hún fór ein inn í fataskápinn hennar Ynju, klæddi sig í nærbuxur af henni og skeit svo í þær!
Það þarf varla að taka fram að Ynja var mjög hress með þetta, hehe :)

2008-01-24T12:34:00.000Z

Hér eru nokkrar myndir frá Tenerife, og fyrst erum það við hjónaleysin, all dressed up, á áramótunum. Við borðuðum 5 rétta máltíð, sem var mjög góð, fyrir utan það að nautakjötið var ofsteikt eins og hættir til á svona samkundum.

Svei mér þá ef amman og stelpan eru ekki bara svolítið líkar! Sætir rauðhausar þarna á ferðinni :)

Ynju og Óðni fannst ekki leiðinlegt! Þarna erum við í labbitúr á el duke!

Við systurnar hressar að vanda, með kokteil í hönd.

Ynja og Óðinn á ströndinni...

Hmm, eitthvað er ég nú annarshugar hér og veit ekki alveg að það sé verið að taka mynd. Reyndar er ég upptekin við að fylgjast með ormunum mínum sem voru að skottast í einhverjum fataslám, hjá sérlega duglegum kaupmanni sem var alltaf að laga dótið í búðinni hjá sér þó engir væru viðskiptavinirnir.

Urður var alveg að fíla ströndina, hún sat á sama blettinum allan tímann alveg svakalega bissí!

Ynja og Óðinn höfðu líka nóg að gera við að moka, búa til kastala og sulla í sjónum. Dásamlegt alveg!

Sætu mæðginin Heiðdís og Þorgils að skoða spékoppana sína.

Jæja! Ekkert blogg í langan tíma og tjéllingin að verða þrí-tug um helgina. Þar sem ég var búin að gleyma að ég ætti afmæli verður enginn gleðskapur, en ég á eftir að ákveða hvort það verður eitthvað á næstu helgi eða hvort ég sleppi því bara alveg ...sjá til bara :)

Hvernig væri samt að monnta sig aðeins af miðafsprenginu sínu, sjáið hvað hann er klár ...7 ára drengurinn!

Hér er hann svo að spila blús

2007-11-13T13:42:00.000Z

Ohh hvað það getur verið ljúft að vera mamma! Ég lá í sófanum í gær og yndislegu dætur mínar tvær (2 og 11 ára) komu og tóku mig úr sokkunum og nudduðu á mér þreyttu mömmulappirnar með aloe vera geli. Nuddið var að vísu mjög mismunandi fyrir hægri og vinstri fót!
Hægri fóturinn fékk kröftugt og markvisst nudd, sem hafði þann tilgang að örva blóðflæðið og koma smá lífi í fótinn. Viðtakandi nuddsins þurfti af og til að svara spurningum um hvort þetta væri gott svona eða hinsegin þegar kröftugir þumalfingur reyndu að vinna á erfiðu svæðunum á hinum mjög svo (ekki) fögru fótum.
Nuddið á vinstri fæti snerist hvað mest um að koma sem mestu geli á fótinn, litlar og ljúfar strokur frá litlum fingrum, tog í tásur og smá fliss yfir mömmutásum af og til.

Já, svona getur þetta verið ljúft, ...ekki þarf ég að hafa áhyggjur af ljótum tám eða gagnrýni hjá þessum fótsnyrtum. Ég er afskaplega þakklát tásu-mamma, sérstaklega í ljósi þess að ég yrði seint beðin um að auglýsa naglalakk eða ökklabönd ...það myndi að minnsta kosti ekki auka söluna get ég sagt ykkur!

2007-11-02T21:37:00.000Z

Fyrsti dagurinn í langan tíma sem mér hefur actually fundist ég vera dugleg! Ég var alveg super dugleg að læra í dag, var að gera skýrslu og sinna B.A. verkefninu mínu. Svo seinnipartinn þrifum við fjölskyldan allt húsið ...enda ekki vanþörf á. Afkvæmin voru sérlega dugleg að hjálpa til og þessvegna var pantaður kínamatur, keypt nammi og ís og við héldum smá þrifapartý. ...núna ligg ég í rauðvínslegi og eldri tvö eintökin eru að dunda sér við að gera heimasíður á netinu. Ynja hefur verið með síðu í smá stund og Óðinn er að búa til sína fyrstu. Ef þið viljið kíkja er það www.ynjamist.bloggar.is og www.bill.bloggar.is

...það er reyndar allt að bilast í netvæðingunni á heimilinu. Ég er semsagt komin bæði á myspace og facebook...

2007-10-22T12:53:00.000Z

Við Heiða áttum alveg æðislegan dag í gær. Við vorum bara að rölta um, fá okkur rauðvín og skoða mannlífið. Við fórum meðal annars í central park, sem er hérna á myndinni. Það er rosalega skrítið að vera inni í fallegum skógivöxum garði og sjá síðan þennan risavegg handan við tjörnina og trén sem maður horfir á, það verður einhvernveginn svona óraunverulegt að horfa á það ...manni líður eiginlega eins og maður sé að sjá vitlaust!
Þetta er samt ofboðslega notaleg og skemmtileg borg, allir svo kurteisir og hjálpsamir og ótrúlega friðsamt þó hér sé margt fólk og mikið líf. Ég væri sko alveg til í að koma hérna aftur ...og lofa þá kannski Ara að koma með líka :D

2007-10-20T04:04:00.000Z

...bara að láta vita af mér :) Ég er komin til nefjork og búin að sjá æðislega krúttlegu íbúðina hjá Heiðu og Andreu! Lenti bara ekki í neinu veseni við komuna og allt í gúddí fíling bara :D

2007-10-05T13:16:00.000Z

Djöfull er ég orðin léleg í þessu bloggi, það telst heppni ef ég pára eitthvað hérna inn á svona viku fresti!
...en jæja, skítt með það, ég er bara svona svaaaakalega bissí!
Ég er aðallega (svona fyrir utan eðlileg heimilisstörf og nám) búin að vera að brasast í gamalli pappírsvinnu undanfarna daga ...og komast að því að það er ekki mjög auðvelt að fá upplýsingar um það hvar maður var staddur seinni hluta árs 2002.
Málið er nefnilega það, að ég er að fara til New York og pantaði miðann vitandi það að ég er e.t.v. grunuð um að hafa verið ólöglega í bandaríkjunum árið 2002. Þegar ég fór til bandaríkjanna árið 2002 og var þar í tvær vikur, þá týndi ég (eða reyndar henti ég því óvart) blessaða I-94 kortinu sem maður á að skila þegar farið er úr landinu. Ef þú skilar ekki þessu korti, þá getur þú lent í því að vera skráður með óákveðna brottfarardagsetningu úr landinu. Ef þú ert í landinu ólöglega í milli 180 - 365 daga, þá máttu ekki koma til bandaríkjanna í 3 ár. Ef þú ert lengur en 365 daga, þá máttu ekki koma til bandaríkjanna í 10 ár.
Þegar ég fór á sínum tíma, þá var mér sagt að ég yrði að láta stimpla í vegabréfið mitt þegar ég kæmi til íslands, til að ég gæti sannað að ég hefði farið. ég lét gera það ...og týndi svo vegabréfinu mínu!
...nú... ég hafði samband við bandaríska sendiráðið á íslandi og þær sendu mér upplýsingar um það hvað ég þarf að gera, og það var svo MIKLU meira vesen en mig hafði órað fyrir! Ég er búin að hringja skrilljón símtöl hingað og þangað, til að fá skriflegar sannanir fyrir því að ég hafi verið á íslandi síðla árs 2002, ég gat ekkert fengið frá icelandair, ekkert frá sýslumanninum (öllum gögnum um gamla vegabréfið eytt), ekkert frá bankanum ...og í þokkabót er ég ekki alveg viss um brottfarardagsetninguna.
Ég endaði á því að senda út upplýsingar um að ég hafi verið skráð í skóla ásamt einum visareikningi og útskýringabréfi! Þetta alltsaman þurfti svo að sendast í ábyrgðarpósti, og sjálf þarf ég að vera með afrit af öllum gögnunum og ábyrgðarnúmerið þegar ég fer út.
Konurnar í sendiráðinu segja að ég komist örugglea í gegn, en gæti lent í yfirheyrslum.

...þessir ameríkanar!

2007-09-25T17:42:00.000Z

Hefur einhver heyrt minnst á fyrirbæri sem kallast the terrible two´s? Það er allavegana í gangi heima hjá mér núna!
Þetta er aldurinn þar sem maður fer að verða svolítið klár og fattar að það er lítið mál að príla bara upp á klósettið til að ná í tannkremstúbuna, það er líka voða lítið mál að ná í litla græna stólinn til að geta enn einusinni náð í blautklútapakkann til að tæta allt upp úr honum ...ótrúlegt hvað það er alltaf jafn gaman!
...og ég meina, hvað hélt mamma eiginlega þegar hún sagði mér að skipta á dúkkunni minni? Hélt hún í alvörunni að ég myndi ekki setja krem á bossann líka?
Það er svo sniðugt, að það er hægt að hella alveg ótrúlega oft úr sykurkarinu áður en það klárast úr því ...eitthvað svona skammtara dót! alveg ferlega sniðugt!

Hvað ætli maður geti hlaupið langt með klósettpappírsrúlluna áður en lengjan slitnar? ...klósettpappírinn já, mamma sagði ekkert um að ég ætti bara að snýta mér einusinni þegar hún bað mig að fara að taka horið ...þannig að ég geri það bara aftur ...og aftur ...og aftur ...og aftur ...og ...vúps, pappírinn búinn!
Hvað er þetta lið að æsa sig ...það voruð þið sem sögðuð mér að sjampóið ætti að fara í hárið! ...hmm, ef sjampó má fara í hárið, þá hlýtur varasalvi líka að meiga fara í hárið ...og bossakrem ...og handáburður...

Mamma málar sig! Af hverju ætti ég ekki að gera það sama? hmmm ...ég er að hugsa um að nota gulan áherslupenna í dag!

Hvað ætli ég sé lengi að taka alla dvd diskana úr skápnum? ...en bækurnar? ...eeen vóóó ...jess! mamma er að brjóta saman þvott, best að bjóða fram aðstoð sína! ...ééééég veit! ég brýt bara aftur saman það sem er í skápnum mínum ...þá þarf ég nú að byrja á því að taka fötin úr skápnum, ekki satt!

Veiiii, ég er bangsímon! Bangsímon borðar hunang! Hér er hunang ...varasalvahunang...

Yndislegur aldur!

2007-09-19T15:45:00.000Z

Nú er ég stolt móðir!
Óðinn var í trommutíma númer 2 í dag, og þegar ég kom að sækja hann kom trommukennarinn fram og sagði við mig frekar hissa á svipinn: hann er alveg skuggalega góður ...pikkar allt upp um leið!

...svo á hún Helga tengdamamma mín á afmæli í dag, og ég er líka voða stolt af henni! Það er bara verst að ég geti ekki verið fyrir norðan og slett í svosem eins og eina köku fyrir hana. Við Óðinn hugsuðum að minnsta kosti til hennar þegar við vorum að baka pönnukökurnar í kaffitímanum áðan, hún hefði í það minnsta átt skilið að fá þær :D

2007-09-18T00:25:00.000Z

Ég var að fá bréf sem ég vil sýna ykkur öllum. Þið sem hafið oft hugsað að þið ætlið "einhverntíman" að hjálpa ...af hverju ekki bara að gera það núna!

Kæri stuðningsaðili ABC barnahjálpar

Við hjá ABC barnahjálp höfum nú tekið inn í skólana okkar og heimili mikinn fjölda barna af biðlista sem voru í mikilli neyð. Nú er staðan sú að okkur vantar stuðningsaðila fyrir hátt á annað þúsund barna.

Þar sem við viljum ekki eyða fjármagni í dýrar auglýsingar, datt okkur í hug að leita til þín.

Vilt þú senda þennan póst með tengli inn á heimasíðu okkar til vinnufélaga, vina og vandamanna og biðja þá að senda þetta áfram?

"Vilt þú styðja barn í neyð? Ýttu þá á http://www.abc.is/ABChjalparstarf/Stydjabarn/

Með fyrirfram þakklæti

ABC barnahjálp

2007-09-13T16:02:00.000Z

Stundum er maður ekki alveg samkvæmur sjálfum sér í uppeldinu! Það hefur verið svolítið vandamál hérna undanfarið að ungfrú Urður á það til að tjá sig á listrænan hátt á hin ýmsu húsgögn og veggi, og myndskreyta bækur þar sem henni hefur fundist vera þess þörf. Hún er hinsvegar smátt og smátt að átta sig á að þetta má ekki ...það má bara fá blað hjá mömmu og lita á það!

Eitthvað minnkar nú gildi þessara skilaboða þegar móðir manns er stöðugt að strika með gulum túss í hinar og þessar bækur! ...það hlýtur bara að vera einhverskonar undantekning frá reglunni!

...ég allavegana giska á að hennar túlkun á þessu hafi verið eitthvað á þennan veg, því Þegar ég kom heim í gær var búið að strika heldur verklega með gulum túss í hugfræðibókina mína!

...hver skyldi hafa verið þar að verki?

2007-09-12T10:40:00.000Z

Óðinn snillingur komst inn í tónlistarskóla Eddu Borgar og er að fara að læra á trommur. Fyrsti tíminn er í dag ...jeiiii :D
Ég er ekkert smá spennt að sjá hvernig þetta gengur, hann er lang yngsti trommunemandinn í skólanum :)

2007-09-10T16:43:00.000Z

Skólinn byrjaður og tíminn strax farinn að fljúga kafla fyrir kafla. Við Ari vorum svaka dugleg um helgina og vorum að taka sjónvarpsholið okkar í gegn ...og nú vantar mig rooosalega mikið að einhver komi í heimsókn að segja mér hvað þetta er nú flott og smekklegt hjá okkur ...hvar eru vinir manns þegar maður þarf á þeim að halda? ...hehe :D
Ég var að byrja að æfa tennis í morgunn og ég held að það eigi eftir að verða alveg svakalega gaman. Ég var mikið skömmuð fyrir vitlaust tak í fyrsta tímanum, það ómaði um allan salinn: "Ester, úlnliðurinn ...úlnliðurinn, ...ÚLNLIÐURINN ESTER!!! Fylgja eftir! klára sveifluna!" eeeen ég var nú alveg að verða komin með þetta í lok tímans, eftir að þjálfarinn hafði tekið nokkur svona "bíómynda demonstrations" á mér. Ég held að ég eigi eftir að verða svaka flott tennispía eftir veturinn :D
kv. Ester

2007-09-03T11:16:00.000Z

Nú hef ég lokið ritgerðinni minni "Athyglisbrestur með ofvirkni: lyfjagjöf og atferlismeðferð". Ég er ótrúlega stolt af mér að hafa klárað þetta þrátt fyrir allt sumarslen. Nú er bara að vona að ritgerðin standist kröfur kennarans ...hef heyrt að hún sé frekar ströng og smámunasöm.
Skólinn er að byrja í dag og ég verð bara í þrem kúrsum (sem reyndar eru allir 5 eininga), próffræði, félagslegri sálfræði og skyn- og hugfræði A. ...ekki laust við að smá spenningur sé kominn í mann ;)

Fréttir af öðrum heimilsmeðlimum:
Ynja: er byrjuð í 6. bekk ...ótrúlegt!!! Hún er svo skynsöm og dugleg að læra ...skipulögð og alltsaman! Auk þess sem hún er snilldar listamaður og heldur áfram í myndlistarskólanum.
Óðinn: var að byrja í 2. bekk, svakalega duglegur að lesa og læra heima, ég þarf samt eiginlega að koma honum í tónlistarskóla drengnum, til að hæfileikar hans á því sviði fái að blómstra ...málið fer í athugun.
Urður: Blómstrar alveg á leikskólanum, fer brosandi á morgnanna og tekur brosandi á móti manni þegar hún er sótt. Henni þarf ég að koma í dansskóla sem fyrst ...mér sýnist að hæfileikar hennar liggi þar. Hlaupastíllinn hennar er líka mjög athyglisverður, en hann líkist eiginlega meira dansi en hlaupi ...óþarflega mikil orka sem fer í hreyfingar sem gera ekkert gagn í því auka hraðann. Rassinn sveiflast til og frá, hendurnar eru krullaðar upp í handakrika og axlirnar sveiflast nánast í hálfhring ...ég verð eiginlega að setja inn video af þessu fljótlega ...hehe :D
Tásla: er enn jafn feit og heyrnarlaus.
...og já, Ari: hmmm, hann er bara að gera það sama og vanalega, vinna og nördast eitthvað þess á milli. ...það vita náttúrulega allir að hann er orðinn mótorhjólatöffari er það ekki? ...og ég þverneita að svo mikið sem setjast upp á fákinn fína!

2007-08-22T11:00:00.000Z

Ég er ekki að standa mig nógu vel með þetta blessaða blogg hérna! ...vonandi er þetta bara langt og gott sumarfrí hjá mér, ég hlýt að fá skrifþörfina aftur þegar skólinn byrjar.
Ég byrja reyndar ekki í skólanum fyrr en 3. sept, en er samt núna á leiðinni upp á bókhlöðu að skrifa ritgerð. Það er nefnilega þannig að ég ákvað að taka sumarkúrs og tókst að sannfæra einn kennara um það að ég væri svo dugleg að ég yrði endilega að taka sumarkúrs! ...ég er reyndar alveg búin að vera að lesa bókina í sumar "parent management training", hún er mjög skemmtileg og gagnleg ...ágætis áminning og upprifjun á því hvernig maður á að koma fram við börn, þó svo að ég sé í rauninni að læra að kenna öðrum foreldrum hvernig þau eiga að koma fram við börnin sín ;)

...ritgerðin er alveg á síðasta séns hjá mér, ég á að skila 2. september og er rétt að byrja að lesa heimildir núna. Ég er að skrifa um áhrif lyfjagjafar á atferlismótun barna með Attention deficit hyperactivity disorder (Athyglisbrestur með ofvirkni). Mjög skemmtilegt efni sem betur fer, annars myndi ég aldrei ná að klára þetta!
Mér finnst bara verst að fá enga aðstoð við þetta, ég veit ekki hvað ritgerðin á að vera löng, hversu víðtæk hún á að vera, hversu mikið ég á að fjalla sérstaklega um ADHD, lyf og atferlismótun ...eða hvort ég fæ einkunn fyrir þetta námskeið eða bara "lokið". ...ég er alveg að renna blint í sjóinn hérna :P

2007-08-14T14:33:00.000Z

Mín er komin heilu og höldnu frá Marokkó, með viðkomu í hinni dásamlegu París!
Marokkó var hreint ævintýri og ofboðslega gaman að koma í menningu sem er svona ólík okkar. Brúðkaupið var svo unreal að manni finnst eins og þetta hafi verið úr einhverri bíómynd. Brúðurin kom fram í hverjum kjólnum á fætur öðrum, alltaf með mismunandi gullkórónur, gullbelti og skart.
fyrst var hún borin inn á börum af fjórum mönnum sem dönsuðu með hana!
Hér er svo brúðurinn aftur borin inn á öðrum börum í nokkurskonar kleópötrubúningi. Hávaðinn þarna inni var ólýsanlegur ...jafnvel fyrir vana djammara! Takið eftir bæninni sem verið er að kyrja þarna.

...svo verður nú að vera mynd líka af brúðhjónunum saman!
Við hjónaleysin vorum svo í hefðbundnum marókkóskum búningum ...rosa flott!
...og við Pála vorum alveg í stíl :D ...einu ljóskurnar á svæðinu ...hehe

2007-07-03T13:36:00.000Z

ég skellti mér á hamingjudaga á Hólmavík um helgina og við systurnar skelltum okkur allar saman á ball á laugardagskvöldinu (...og jú, kallarnir okkar fengu að koma með líka) Ég stal þessum myndum af síðunni hennar Sóleyjar frænku ...en hún er algjör snillingur eins og sést hér!
Nú!!! ...en kvöldið snerist semsagt aðallega út á þennan jakka hér, sem björk systir tekur sig alveg frábærlega út í. Þetta er forlátur leðurjakki sem hún Heiðdís systir mín fékk í jólagjöf þegar hún var 10 ára. Þetta er mjög stuttur og glæsilegur jakki, skreyttur allskyns pallíettum og ekki skemmir fyrir að á bakinu er nokkurskonar áfastur bakpoki eða svona stór vasi sem hægt er að loka og passar fínt undir nokkrar bjórflöskur. Axlapúðarnir eru af stærð XL.

Þar sem 85 fílíngurinn var á annað borð mættur hjá systrunum, máttum við til með að taka smá dangerous girls á þetta.

Heidí var hress (þó ekki með jakkann) og vildi alltaf að við myndum segja neeeeeeeeeei, þegar það var verið að taka mynd af okkur.

Hérna erum við systurnar með hressleikann í fyrirrúmi og tilbúnar í slaginn!

Ókei ...það er pínu fyndið að ég og ari héldum að við værum með myndavélina hennar Bjarkar og Björk hélt að þetta væri myndavélin okkar ...en þetta var semsagt myndavélin hennar Sóleyjar. Ara langaði mikið til að gefa Björk mágkonu sinni fína mynd af sér og setti því upp Zoolander svipinn og smellti af. Þessvegna er núna mynd af honum á síðunni hennar Sóleyjar ...og á síðunni minni. Til hamingju með það Ari :D

2007-06-21T15:29:00.000Z

Við fórum í sveitina til ömmu Helgu um síðustu helgi. Tilgangurinn var reyndar að fara í útskriftarveisluna hennar Silju, sem heppnaðist alveg ljómandi vel. Amma og afi á neðri hæðinni eiga hund sem heitir Bella og henni þykir alveg óskaplega gaman þegar einhver nennir að leika við hana. Urður hafði ekkert á móti því að leika við Bellu og skipar henni fyrir alveg eins og herforingi.

2007-06-18T12:34:00.000Z

Nú ætla ég að tékka hvort ég kann á youtube! Ef allt gengur að óskum getið þið séð Óðinn snilling tromma hér að neðan! Þetta er nú nokkuð gott þegar maður hefur aldrei farið í trommutíma og er bara nýbúinn í fyrsta bekk :D

2007-06-14T11:15:00.000Z

Nú er spurning að reyna að herða sig við bloggið og koma með eina skemmtilega sögu eða svo :P

Ég var að lesa gamla bloggið mitt í gær og sá þá meðal annars sögu af forlátri úlpu sem ég átti, en hún fékk að fjúka sama dag og færslan var framkvæmd þar sem hún virtist gera eiganda sinn óvenju ungæðislegan og var farin að valda fremur óskemmtilegum misskilningi.

...og bíðið við! Nú kemur framhald...
Ég er að vinna inni í Hafnarfirði og þarf því oft að taka strætó seint á kvöldin og hlaupa langar leiðir til að ná honum. Í gær var ég svo heppin að ég náði að stökkva inn í hverfisstrætóinn og þurfti því ekki að hlaupa alla leið inn í Garðabæ eins og venjulega.

Það hlýtur að hafa verið barnslegt sakleysi sem skein úr augunum grænu, þegar ég stökk rjóð í kinnum inn í strætóinn eftir að hafa hlaupið hann uppi og henti miðanum mínum í baukinn og bað um skiptimiða.
...strætóbílstjórinn lítur á mig og smellir á reit í tölvunni sinni og prentar út skiptimiða!

(mér sýndist hann vera að ýta á vitlausan takka, þannig að ég þorði ekki annað en tékka miðann ...og jú, það var ekki um að villast. Á miðanum stóð 1 x barnamiði - 100 kr.)

"....eeee, ertu að láta mig hafa barnamiða???"
"...eee ...já ...hva..."
"ég er ÞRÍTUG!" (ég er nú ekki vön að ýkja aldurinn, en ég mátti til þarna!)
"ó ...úpps ...þú ert ungleg"
"hehe ...já, sko ...hehe (ógissla montin sko)"

ókei! Ungleg - það er gott. ...en 17 - æ, ég veit ekki. Væri meira til í tuttuguogeitthvaðsmávegis ...17 er eitthvað svo mikið gelg (ekki samt þú Björk mín, þú ert yndisleg)!

Svo er það spurningin: Þarf ég líka að losa mig við rauðu hettupeysuna (sem er svoooo þægileg)?

2007-06-06T17:02:00.000Z

Greinilegt að bloggið mitt er komið í sumarfrí. Ég er bara hreinlega ekki að nenna að skrifa neitt. Ég finn ekki hleðslutækið af myndavélinni minni, þannig að ekki get ég sett inn myndir :( Þetta er semsagt alveg gjörsamlega glatað blogg núna (ég stefni nú samt á víðtæka leit að hleðslutækinu fljótlega).
Annars er bara allt í besta, nýja vinnan er fín og ég er byrjuð að lesa í sumarkúrsinum sem ég tek. Einkunnir voru framar vonum ...enda er ég alveg búin að sjá það út að ég hef fengið væga heilabiliun vegna of mikils lærdóms ...án gríns, það er eitthvað hrikalegt straumrof í gangi í heilanum á mér núna, ég bara held í vonina að þetta lagist :D

Urður er að byrja á leikskólanum og henni finnst það svo spennandi að hún ætlar alveg að missa sig þegar hún sér að við erum að stoppa fyrir utan leikskólann ...ég var búin að segja á leikskólanum að barnið mitt væri feimið ...fóstrurnar eru búnar að horfa undarlega á mig síðan við byrjuðum í aðlögun, þar sem barnið hefur ekki sýnt minnsta vott af feimni.

Ynja og Óðinn fá einkunirnar sínar afhentar á morgunn og svo eru þau komin í sumarfrí ...og algjörlega óákveðið ennþá hvernig á að verja því!

...jæja, þarf að fara að sinna ormunum! bæjó

2007-05-27T12:44:00.000Z

Nú þegar sumarið er komið finnst mér alveg rosalega mikilvægt að vara fólk við óheiðarlegum mönnum sem koma heim til fólks og úða garðana hjá þeim. Í gær kom hingað maður og úðaði garðinn okkar án þess að spyrja kóng né prest, svo bankaði hann uppá hjá mér og sagði að þetta hefði verið pantað fyrir tveim dögum og nefndi nafn manns sem bjó hérna fyrir ári síðan. Ég sagði að ég kannaðist ekkert við að hafa pantað garðúðun og bað hann að spyrja fólkið á neðri hæðinni. Hann segir svo við þau að þetta sé gert árlega í þessum garði! ...þau pöntuðu enga úðun heldur.
Fyrir utan það að þetta eru mjög óheiðarleg vinnubrögð, þá ber þessum garðúðurum skylda til að skoða garðinn áður en hafist er handa við að úða og upplýsa eigendur um ástand garðsins. Hér voru ekki komnar neinar lirfur og því engin þörf á úðun! Garðúðun hefur EKKERT forvarnargildi. Það á alls ekki að úða garða að nauðsynjalausu og þetta eiga þessir menn að vita ...auk þess sem þeim ber skylda til að sýna alltaf fullgilt leyfisskírteini.

Ef einhver kemur til að úða garðinn hjá ykkur, verið þá viss um að þörf sé á því. Ef einungis nokkrar lirfur eru í garðinum þarf ekki að úða, heldur bara að lofa náttúrunni að ganga sinn gang. Óþarfa úðun getur raskað lífríki garðarins og eytt jafnt gagnlegum pöddum sem skaðlegum.

Ég bendi á góða grein frá umhverfisstofnun: http://www.eftirlit.is/Gardaudun.htm

2007-05-23T09:05:00.000Z

Ég er svo ótrúlega stolt af sjálfri mér núna, að ég verð bara að fá að monta mig aðeins. Ég fékk einkunn úr Lífeðlislegri sálarfræði í gær, og fékk 8. Svo fór ég að skoða tölfræðina og komst að því að ég (ásamt einhverjum þrem öðrum) var hæst í kúrsinum :D

...bjóst sko alls ekki við þessu! Rosalega góð tilfinning að vera betri en hundraðogeitthvað manns í einhverju ...hehehe :D

Annars sá ég eitt svolítið sniðugt á vísindavefnum í dag, verið að tala um "fröken fix", en þar kemur fram að aðeins eldra fólk og miðaldra noti þessi orð ...hvort er ég?
...æ já!! ég er frá Hólmavík!

http://visindavefur.hi.is/?id=6619

2007-05-21T22:13:00.000Z

Það er gott að hafa góða barnapíu! Hún Silja mín var að passa aðeins fyrir mig um daginn, og þegar ég kom heim tók ég eftir því að sólgleraugun mín voru brotin!
Þeir sem eiga börn vita vel, að það getur verið ansi erfitt að fá uppúr þeim hver framdi glæpinn og oft þarf að láta málin niður falla vegna skorts á sönnunargögnum. En nú kemur parturinn af hverju barnapían er svona góð. Sem fyrrum lögfræðinemi gætir hún sín á því að hafa skotheld sönnunargögn, sem hún svo sendir mér, móðurinni.

...hvað segið þið? liggur ekki málið alveg ljóst fyrir? ...ættu þetta ekki að vera nægjanleg sönnunargögn, ...skoffínið staðið að verki?

Sektin sést nú bara á andlitinu á henni!Annars sá ég nú að hún Íris frænka mín var að kommenta hérna hjá mér, og ég verð að segja að ég er hjartanlega sammála því að við verðum að fara að hittast "lillufólkið". Er ekki einhver í fjölskyldunni ótrúlega góður planari? Allavegana sýnist mér að það sé nú ekki skortur á því að vilja hittast ...vantar bara að einhver taki sig til og ákveðið að hittast :D Mann langar ekkert smá að sjá öll þessi börn sem eru komin í fjölskylduna.

2007-05-14T16:58:00.000Z

jeiiiii!
Búin í prófunum ...ó mæ god hvað ég er fegin!
Þessi próf eru nú alveg agaleg ...ég er allavegana alveg að drepast úr ljótunni núna, oj oj oj. Það kemur einhver svona inniveru nörda blær á mann, án gríns! Fyrir utan það að þessi fína bólufjölskylda ákvað að setjast að á andlitinu á mér, þá er ég bara einhvernvegin öll úr lagi gengin.
Mikið rosalega langar mig að fara bara á næstu snyrtistofu, í nudd, andlitshreinsun, plokkun og litun og vax! djö sem ég þarf á því að halda! Ég er orðin svo illa haldin af ljótunni að mig langar til að fara í leiseraðgerð svo ég geti hætt að vera gleraugnaglámur ...gleraugun mín eru einhvernveginn skökk og bæta ekki nördalúkkið.
Reyndar á nú spegillinn hennar Silju alveg mjög stóran þátt í þessum áhyggjum :P ...ef þið (stelpur) viljið sjá ykkur með bólur og skegg, kíkið þá í heimsókn til Silju ...hún á sko spegil sem lætur ykkur fá alveg þokkalega gott raunveruleikasjokk! Ég veit ekki hver hannaði lýsinguna inni á baðherbergi hjá Silju, en það er nokkuð ljóst að hann fær ekki að hanna lýsinguna inni á baði hjá mér!

:::Þá kýs ég nú frekar að lifa bara í lygi:::

2007-05-11T18:05:00.000Z

eeeeeitttt próf eftir og svo er ég búin!!!
Það er bara verst að það eru kosningar þarna í millitíðinni, þannig að maður missir af mesta fjörinu og spennunni sem á eftir að fylgja þeim, mest spennandi kosningar í áratugi!
Það er nú ekkert leyndarmál að mín staða er alveg út á vinstri kantinum og eitthvað um það að stjórnmál séu rædd á heimilinu. Elsta barnið á bænum hefur sýnt stjórnmálum mikin áhuga, ekki síst eftir að ég tiltlaði hana tilvonandi formann vinstri grænna, vegna þess hve hún tekur umhverfismál, endurvinnslu og málefni hinna minni máttar alvarlega. Eitthvað virðist nú líka vera um það að stjórnmálin séu rædd inni í skólastofunni í 5. bekk D í Kársnesskóla.
Ynja kom heim í dag mjög óðamála og sagði að ein stelpa í bekknum, sem styddi Sjálfstæðisflokkinn hefði sagt að vinstri grænir ætluðu að snúa Íslandi á hvolf!
"Hún heldur að Ísland fljóti á sjónum! Flýtur Ísland nokkuð á sjónum, ha mamma???"
"-nei, Ísland er fast ...eiginlega bara svona fjall í sjónum"
"Sko ...vissiða, vissi að það væri ekkert hægt að snúa Íslandi á hvolf!"

Mjöööög heitar stjórnmálaumræður í skólum landsins.

Þið öll, kæru vinir munið bara að kjósa rétt! Nú er tíminn til að fella ríkisstjórnina ...við getum þetta alveg. ...og í guðanna bænum, ekki láta þennan bjánalega hræðslu kommúnismaáróður hafa áhrif á ykkur, eitthvað rauðukallakjaftæði!

Áfram VG!

2007-05-05T10:18:00.000Z

Prófin eru farin ad segja til sín, ég er farin ad taka alveg hrædilega heilalaus móment! Ég stökk á Silju í gær og bad hana um yddara ...ég meinti samt heftara, allavegana pínu líkt. Svo thegar ég kom heim í gærkvöldi, thá sló ég nú öll met. Ég hafdi keypt einhvern súkkuladi sojabúding til ad láta Urdi borda og Ari var ad segja mér ad hún vildi ekki sjá thennan súkkuladibúding! Thá segi ég, starandi heilalaus út í loftid: "vill hún samt ekki alveg melónudrykkinn?" ...Ari gaf mér mjög skrítinn svip, vitandi ad thad er vissulega ekki til neinn melónudrykkur heima hjá okkur, og hefur aldrei verid!
"eee ...Ester, ertu kannski ad meina vanillubúdinginn?"

...oj oj oj og ómægod! Hvernig slær saman í hausnum á manni ordunum melónudrykkur og vanillubúdingur? ...ég kannast ekki einusinni vid thad ad hafa keypt, drukkid eda átt melónusafa! Thad er varla ord einusinni!

thetta litla atvik nægdi nú samt til ad skemmta mér ærlega í gærkveldi, ég ætladi ekki ad geta hætt ad hlæja út af thessu ...er madur nú stúpid líka ofan á allt annad!

...og bara svo thid haldid ekki ad ég sé ordin alveg klikk, thá er thorn og ed bilad í tölvunni hjá mér!
Kvedja from da brainhouse!

2007-05-03T17:23:00.000Z

ohh! Ég er svo stolt af sjálfri mér, ég hljóp 4.3 kílómetra áðan ...ég held að ég hafi bara aldrei í lífinu hlaupið svona langt áður (og nota bene, hlaupa ...ekki labba). Vegalengdin sem ég get hlaupið er alltaf að lengjast og ég er stöðugt að koma sjálfri mér á óvart ...love it!

Annars er bara eitt próf búið og fjögur eftir ...ég ætla ekki að gera ykkur það að fara að vera með einhver leiðindi núna!

Ég held að ég sé búin að vera of mikið með henni Silju minni núna undanfarið ...Silja fékk á einhvern ótrúlegan hátt mjaðmaverkina mína, sem læknar hafa enga skýringu fundið á ...og ég er reyndar búin að vera laus við í smá tíma. Fólk er farið að halda að við séum kærustur

...og Silja, án gríns, ég fékk alveg hrikalegan verk í kúluna á ökklanum núna þegar ég var að hlaupa (hef aldrei fengið svoleiðis áður), og eitthvað minnir mig að ég hafi heyrt þig segja það nákvæmlega sama í gær. Þetta er nú hætt að vera normal!

2007-04-27T16:07:00.000Z

Eitthvað eru prófafróðleiksmolarnir mínir að komast illa til skila! Dagarnir líða bara svo ótrúlega hratt að þó mér finnist eins og ég hafi bloggað bara í gær, var það víst fyrir þrem eða fjórum dögum síða. Það er allavegana markmiðið að koma með skemmtilega prófafróðleik, ...ekki eitthvað um normalkúrfur og póstmodernisma!

Fróðleikur dagsins gjössovel:

Okkur finnst öllum sjálfsagt að grunnur talnakerfis okkar sé 10, og að við notum puttana (til að byrja með allavegana) til að öðlast skilning á fjölda. Okkur finnst líka sjálfsagt að allir aðrir ættu að skilja þetta kerfi jafn vel (svona erum við nú einföld). Oksapmin þjóðflokkurinn í Nýju Gíneu notar annarskonar talnakerfi, sem samsvarar fleiri hlutum líkamans en bara fingrunum. Grunnur talnakerfis þeirra eru 27 tölur. Þeir byrja að telja fingur annarrar handar, svo kemur úlnliðurinn (6), mitt milli úlnliðs og olnboga (7), olnbogi (8), upphandleggur (9), öxl (10), háls (11), eyra (12), auga (13) , nef (14) og svo eins til baka niður hinn handlegginn alveg upp í 27!

2007-04-24T08:57:00.000Z

Bloggleysi undanfarið stafar af endalausum lærdómi og andleysi vegna þess. Þið eigið þvi ekki von á neinu skemmtilegu, nema ykkur langi rosalega mikið til að vita eitthvað um lífeðlisfræðileg ferli í heilanum, þá gæti ég skrifað alveg nokkur blogg um það!
...og já, það var verið að spyrja mig hvar myndasíðan mín væri. Hún er bara því miður ekki til staðar, einu myndirnar sem koma eru þær sem ég nenni að setja inn á bloggið mitt. Samt alveg spurning um að gera eitthvað myndaalbúm, þegar veður leyfir.

Ég ætla að reyna að koma alltaf með einhvern súperdúber skemmtilegan fróðleik á meðan ég er í prófunum, til að sýna ykkur hvað námið mitt er skemmtilegt ...heheheee :D Þetta verður svona "vissuð þið... blogg" næstu daga ...og ef einhver veit, þá má hann commenta ..phee, jahá ...hver veit það nú ekki! ...eða eitthvað álíka.

*Vissuð þið að það eru til konur sem hafa XY litning? Ef 23 litningurinn er XY segir það að fóstrið eigi að vera karlkyns, og Y litningurinn veldur því að andrógeni er seytt í líkama fóstursins. Það er hinsvegar til genagalli (stökkbreytt gen á X litningi) sem veldur galla á andrógenviðtökum. Kynkirtlarnir verða að eistum (þar sem Y litningurinn stjórnar því án þess að andrógen þurfi). Hormón sem á að koma í veg fyrir að innri kynfæri kvenna þroskist kemst til skila og því þroskast ekki leg og eggjastokkar. Andrógenið kemst hinsvegar ekki til skila og þessvegna verður líkaminn, ytri kynfræri (og heili reyndar), kvenkyns. Ef líkaminn á að verða karlkyns, verður andrógen að festast í andrógenviðtaka til að virkja "kerfið". Þetta er því kona, án innri kynlíffæra (en samt með eistu einhversstaðar innaní sér). Þetta kallast Androgen insensitivity syndrome.

...þeir sem horfa á doctor House gætu mögulega hafa vitað þetta! Silja þarf ekki að segja "ég veit" af því að ég veit að hún veit. hehehe :D

2007-04-18T11:44:00.000Z

Það er komið allt of nálægt prófum til að mig langi til að trúa því! Ég er bara að basla núna við að skila síðustu verkefnunum og svo hefst prófalestur af fullum krafti. ...ég reyni nú samt að gefa mér tíma til að setja inn myndir fljótlega, úr páskafríinu og af stórglæsilega nýja herberginu hennar Ynju sem ég tók í gegn á síðustu helgi :D

2007-04-10T23:33:00.000Z

hellúú gott fólk!
Páskafríið að baki og eðlileg störf tekin við að nýju. Við skruppum á ættaróðalið að Sjávarborg og vorum þar í góðu yfirlæti yfir páskana. Krakkarnir voru svo mikið úti að leika, milli þess sem þau hökkuðu í sig páskaegg.
Yngsta tilfellið fékk líka páskaegg, og fékk að ráðstafa því að eigin vild. Það var súkkulaði út um allt, munn, hendur og kinnar. Ég tók fljótt eftir ákveðnu þema í páskaeggjaátinu hjá henni. Hún stakk upp í sig, hafði það uppi í sér í smá stund og tók það svo út úr sér aftur. Svo var nammið bara út um allt, hálftuggið með slefi!

Þetta væri nú varla í frásögu færandi ...nema!
Að þar sem ég lá í sófanum að láta líða úr mér, kemur skoffínið askvaðandi og stingur upp í mig rúsínu, sem hún hafði greinilega smakkað aðeins á sjálf áður. (Ég er nú ekkert að snobbast eitthvað við það að borða ekki hluti þó hún hafi sett þá upp í sig).
Þegar ég er að rísa upp úr sófanum sé ég að það er kúlusúkk, eða eitthvað álíka í sófanum, og segi stundarhátt ...andsk** djö... hún er búin að klína kúlusúkki í sófan ...ohh!
Ég tek kúlusúkkið ...og tek strax eftir að það er eitthvað bogið við það!

...vissulega var það brúnt, og líktist kúlusúkki ...en ég fann nú fljótt eftir að hafa gripið þetta milli þumalfingurs og vísifingurs að þetta átti rætur sínar að rekja til bleyuskipta sem fram höfðu farið í umræddum sófa skömmu áður, lítið lambasparð sem hafði sloppið við ruslafötuna.

Ég get bara sagt ykkur að ég er ævinlega þakklát fyrir að hafa verið að drekka bjór kvöldið áður og hafði ekki alveg lyst á að stinga kúlusúkkinu upp í mig, eins hvatvís og ég get nú verið!

2007-04-03T23:26:00.000Z

...ohh, stundum verð ég þreytt á sjálfri mér! Bara hvernig ég get verið. Óákveðin, reyni að gera öllum til geðs, of næs í tilfellum þar sem ég ætti að vera ákveðin ...læt valta yfir mig! Á morgun þarf ég að vera svolítið ákveðn, sendið mér endilega góða strauma!

2007-03-29T11:21:00.000Z

úff ...ég sit hérna með tárin í augunum uppi á bókhlöðu. Ég á svooo erfitt með að lesa um börn á munaðarleysingjahælum í Rúmeníu og Líbanon. Sum þeirra fá svo litla umönnun og mannleg samskipti að þau eru mjög þroskaskert þegar þau komast á unglingsaldur (ef þau eru áfram á hælinu). Sum þeirra eru aldrei ættleidd!

Þau sem eru ættleidd ná sér alveg ótrúlega vel, miðað við þá vanrækslu sem þau bjuggu við til að byrja með, og því yngra sem barnið er við ættleiðingu, því betra.

Af hverju taka þessi ættleiðingaferli svona rosalega langan tíma? Fólk er að bíða í mörg ár á einhverjum listum ...og eins gott að maður reyki ekki eða sé feitur. Maður þarf nánast að vera dýrlingur til að fá að ættleiða barn!

2007-03-28T17:26:00.000Z

hæ hæ ...allt fínt að frétta af mér :)
ýmislegt jákvætt í gangi :D

Til dæmis:
-ég fékk að sofa heila nótt í nótt, ég var svo glöð þegar ég vaknaði í morgunn að það var eins og ég hefði unnið óskarinn fyrir besta svefninn :D
-öllum verkefnum hefur verið skilað on time ...og verkefnin sem eru eftir verða það pottþétt líka (hvers vegna? ...svarið er afþvíbara ég segi það!)
-ég er komin með vinnu í sumar

-kvefið er að hörfa
-daginn er að lengja
-ég var að skrá mig í brautskráningu næsta vor

þið eruð öll ótrúleg krútt og dúllur ...mæ frends, i luuuuuv jú all :D

...nei, ég gleymdi ekki að taka lyfin mín í morgun ;)

2007-03-25T22:33:00.000Z

Nú náði Skoffínið heldur betur að toppa sjálfa sig í dag. Þegar ég var á leiðinni út að hlaupa kemur hún trítlandi, í miðjum klíðum að maka á sig hvítu rassakremi. Hálf dolla gott fólk! Í hárið og andlitið. Ég skellti henni fyrir framan spegilinn og reyndi eftir bestu getu að sýna henni framá að þetta væri ekki mjög fínt. Hún sýndi hinsvegar enga iðrun og hló hátt og mikið ...gretti sig framan í spegilinn!

...en jæja, ég þurrkaði það mesta og dreif mig svo út að hlaupa og skildi Skoffínið eftir hjá föður sínum.

Við endurkomu mína frá hlaupunum blasir við mér rúmlega eins og hálfs árs gothari! Hún komst semsagt í veskið mitt og fann þar alveg merkilega góðan svartan augnblýant. Hún hefur greinilega eitthvað séð til móður sinnar við snyrtimennskuna, þar sem búið var að gera eitthvað voða fínt og frumlegt skraut í kringum augun ...og auk þess reyndar alla handleggina líka, sem móðirin hefur reyndar ekki mikið stundað.

...ég ætla ekki að segja ykkur hvað var erfitt að ná þessu af í baðinu!

2007-03-20T21:02:00.000Z

Hún systir mín vill vita hversvegna hún er ekki á desperet housewifes myndinni, og telur að það sé vegna þess að hún sé svo mikil Gyða Sól. Ætli það sé ekki bara rétt ...hehehe. Það eru engar svona ofur- hestakonur í despó! Ég sé það samt alveg í anda að það flytji ein svona kona sem stundar massaðar lyftingar á kvöldin og laumast svo í sund í thonginum sínum.

Hún væri þá einhvernveginn svona...

Ef þér líst vel á þetta Heidí ...þá er bara að drífa sig í að fara að lyfta og taka smá stera með (og ekki má gleyma að kaupa svona sundbol!)

Heidí systir er samt að sjálfsögðu algjör ofurmamma, yfir-hestakona fjölskyldunnar, dugnaðarforkur og alltaf til í að hjálpa manni. Algjört yndi!! :D

2007-03-20T12:08:00.000Z

ahhh! hangsidagur!
Ég sendi Ara með Urði til dagmömmunnar í morgun og ákvað að gera svolítið sem er mjöööög langt síðan ég hef gert -sofa út-
ég vaknaði svo bara um hálf ellefu, búin að lesa blöðin spjaldanna á milli og drekka nokkra bolla af kaffi ...ein og í rólegheitum.
Nú er hinsvegar kominn tími til að láta til sín taka: ég þarf að ákveða um hvað lífeðlisfræðiritgerðin mín á að vera. Ég var að pæla í annaðhvort að skrifa um hægbylgju svefnraskanir eða speglataugar, hvort líst ykkur betur á? ...eða kannski bara eitthvað allt annað ...ég er mjög óákveðin í þessu!

2007-03-16T16:51:00.000Z

Ég hef mjög gaman af Desperate Housewifes, og ekki síst þar sem ég er ein slík sjálf (og skammast mín ekkert fyrir það).

Hér eru mínar Desperate Housewifes, eða að minnstakosti nokkrar þeirra! Ég vona að þessi mynd eigi ekki eftir að valda neinum vinslitum. Ég hefði að minnsta kosti aldrei þorað að setja hana móður mína þarna nema vegna þess að hún er stödd erlendis næstu tvær vikurnar og fer væntanlega ekki í tölvu á meðan (ekki segja henni, svona langlínusamtöl eru nefnilega svo dýr) ...ég verð bara að vona að hún sé ekki jafn hefnigjörn og hin rauðhærða Bree.

Ef einhverjir eru að velta því fyrir sér hverjar þetta eru, þá eru frá vinstri: Lísa ofurmamma, Didda ofurmamma, svo hún ég, móðir mín, og Silja mágkona. Ætti ég að fá mér svona permanett ...haaa? ...eða mamma að safna hári?
...veit samt ekki alveg afhverju ég hef tíma núna í að vera að búa til einhverjar myndir í photoshop, eitthvað voðalegt kæruleysi í gangi held ég...

2007-03-14T11:09:00.000Z

Mér líður svoooo eins og ég sé snillingur núna!
Ég fór út að skokka í fyrradag ...sem eitt og sér er nú alveg í frásögu færandi, eeeen fékk þessa líka frábæru hugmynd!
Ég hef ekki látið deigan síga, heldur sagt öllum frá sem heyra vilja ...og verð nú því víst að setja þetta á bloggið mitt líka.

Þegar ég var að hlunkast áfram (í spánnýju, prófessional maraþonhlauparaskónum sem ég fékk frá mömmu og pabba í afmælisgjöf), másandi og blásandi á móti vindi, fór ég að hugsa um afhverju ég væri ekki að hreyfa mig daglega ...eða að minnsta kosti nokkrum sinnum í viku. Kort í ræktina eru dýr, og maður sér strax eftir því að hafa keypt þau ef maður er ekki að mæta vel.

...ég held nefnilega að lausnin sé sú að kaupa EKKI líkamsræktarkort, heldur borga sjálfumsér í hvert sinn sem maður fer út að hlaupa.

taddaraaaa! Þannig að í hvert sinn sem ég fer út að hlaupa, legg ég 250 kall inn á minn eiginn sparnaðarreikning (sem er að sjálfsögðu opinn) og safna dágóðum slatta, sem mér er síðan frjálst að nota í hvaða vitleysu sem er: helgarferð, kaupa eitthvað sem ég hefði annars ekki keypt (einhvern algjöran óþarfa) ...eða bara eitthvað rugl :D

Þetta er hvetjandi kerfi, og algjörlega í sambandi við atferlislögmál, pjúra jákvæð styrking!

...ef eitthvað fyrirtæki vill ráða svona ótrúlega hugmyndaríka manneskju í vinnu í sumar og borga mér kannski svona ...jahh, 500 kjell á mánuði, þá er ég game!

...og ef einhverjir starfsmenn Kaupþings vilja vita hvað ég fer oft út að hlaupa, þá er bara að skoða yfirlitið á kostabókinni minni :)

...og bíðið nú við ...fór ekki gellan bara út að hlaupa í gær líka, í roki, rigningu og slagviðri ...með maskarann lekinn niður á kinnar ...í maraþonskónum ...húfu af Óðni ...og regnjakka af Ynju, (trúið mér, ég var mjög töff!)

áfram Ester, áfram Ester, áfram Ester ...you can do it!!! (...þetta var sko það sem ég hugsaði þegar ég var að hlaupa)

2007-03-12T17:32:00.000Z

Það er orðið nokkuð ljóst að við Ari ætlum að skreppa til Marokkó í sumar, þar sem allt bendir til þess að mér hafi tekist að gabba móður mína til að passa Skoffínið í eina viku eða svo. Ég mun svo líklega reyna að dreifa hinum tveim jafnt á einhverja fórnfúsa ættingja ...eru einhverjir sjálfboðaliðar?
Allavegana ... við ætlum að fljúga til Parísar og fara þaðan beint til Marokkó og vera þar í 5 daga og vera svo í parís í 2 daga á bakaleiðinni, af því að við höfum aldrei komið þangað áður.
Þetta hentar visa kortinu mínu alveg ágætlega því planið er að sjálfsögðu að setja bara eitt flug eða hótel á hvert visa tímabil ...ógisslegasniðugtsko!

Það skemmtilega við ferðina er líka það að vinur okkar er að fara að giftast konu frá Marokkó, þannig að við förum í brúðkaup sem stendur yfir í tvo daga, ekta marókkóst bryllup!

...verðlagið á svæðinu á nú ekki eftir að spilla fyrir manni heldur ;)

Svo heyrði ég nú reyndar áðan að það var gaur að sprengja sig í loft upp í Marokkó núna, en honum tókst nú ekki að drepa neinn nema sjálfansig ...held að þeir séu ekki jafn pró þarna í Afríku eins og í Mið-Austurlöndum.
Ekkert sem bendir til þess að þetta sé neitt hættulegra en að fara til London ;)

2007-03-09T10:59:00.000Z

jessss! Þetta hafðist, og ég er enn á lífi!
Ég kláraði ritgerðina mína klukkan korter í eitt í gærdag (átti að skila rúmlega eitt).

Ég held að ég hljóti hvorki verðlaunin "mamma ársins" þetta árið né nóbelsverðlaun fyrir frumlegar kökuskreytingar!
Ég lenti í þeirri bitru reynslu í gærmorgun að horfa á vonbrigðaglampann í augum sonar míns, þegar hann sagði með titrandi röddu ..."já en mamma, ég var búin að segja þeim að það yrði bílakaka"!
Mamman á heimilinu hafði semsagt bara búið til eina hálfglataða skúffuköku og reyndi með afsökunartón í röddinni að útskýra hvað væri nú mikið að gera, skólinn sko... og ritgerðin sko... og sko þarna veikindin...
Þegar ég sá að augun voru að byrja að vökna sagði samviskubitna móðirin hressri röddu: "heyrðu! Við reddum þessu" ...en hugsaði: "shit! hvernig í andskotanum á ég að fara að því!"

...og Halelúja...
Thank god fyrir bakarameistarann og internetið! ...ég fann það út að hægt væri að kaupa áprentað marsipan í bakarameistaranum. Það þarf reyndar að vera rúmlega eins dags fyrirvari, eeeen þeir hafa heyrt örvæntinguna í röddinni og ákváðu að "redda mér" eins og þeir orðuðu það.

-Drengurinn fékk glæsilega "Cars" bílaköku
-móðirin skilaði ritgerðinni á réttum tíma ...og lífeðlisfræðiskýrslunni
-allt í svona líka lukkunnar velstandi ...fínasta afmæli ...allir kátir og hressir

2007-03-07T08:58:00.000Z

Jæja gott fólk, svona er staðan:

Ritgerðir sem á að skila á morgun: 1
Lífeðlisfræðiskýrslur sem þarf að ljúka fyrir morgundag: 1
Fjöldi veikra barna á heimilinu: 1, dagur nr.: 2
Afmæli sem þarf að halda á morgun: 1, fjöldi: 18, meðalaldur gesta: 6,5.
Kökur sem þarf að baka fyrir morgundaginn: 1 (já, ég veit ...frekar lásí)

heimilisstatus:
drasl: sæmilegt
drulla: meiri en meðalhófi gegnir
þvottur: c.a. 1 tonn

Aðgerðir sem á að taka:
1. Anda djúpt og fara í sturtu - lokið kl. 08:30
2. borða góðan morgunmat - lokið kl. 9:00
3. Mikið kaffi - er að vinna í því.
4. baka köku - áætlað að ljúka fyrir hádegi, barn verður staðsett uppi á borði á meðan.
5. kaupa mikið mikið af nammi, snakki og gosi, og efni í pizzu - lokið í gær, með ofur hraðferð í bónus.
6. Þrif - þetta er barnaafmæli, svo ekkert annað en úrvals, hágæða ofur skyndiþrif á þreföldum ljóshraða kemur til greina - planað að ljúka meðan barn sefur.
7. Efni (t.d. leikir) til að halda 18 krökkum uppteknum í tvo tíma - Ynja sett í málið!
8.Ljúka lífeðlisfræðiskýrslu - stefnt á að ljúka áður en maki kemur heim, nýta ljóshraðaaðferðina.
9. Ljúka ritgerð - yfirgefa svæðið þegar maki kemur heim og skrifa 1500 orða gæðaritgerð um greind, fjöldi heimilda er 5, lokið við að lesa 4, orð skrifuð: 300, orð eftir: 1200. Áætlaður tími: 7 klukkustundir, ef ég er bjartsýn!

Líkur til að þetta takist: mjööööög mjöööög góðar :D

nýjustu veikindatölur og spár:
tími síðan síðasti fjölskyldumeðlimur var veikur: 4 dagar
tími síðan yngsta krílið var veikt síðast: 16 dagar
Ester að halda að hún sé að verða veik: 3 dagar
...ástæða fyrir að Ester er ekki orðin veik: ...bara alveg pjúra viljastyrkur sko...

2007-03-06T11:41:00.000Z

Komum inn á síðuna mína hefur líklega fjölgað stórlega! Ég sá að það var komin linkur á mig inni á strandir.is, og ég hef ekki grænan Guðmund um hver hefur klínt mér þar inn. En ég sá allavegana að 55 manns höfðu skoðað síðuna mína þaðan ...margir sem hafa áhuga á að lesa um húsmóður og námsmær sem er fúl og leiðinleg þessa stundina, en berst þó hatrammlegri baráttu við bakteríur og vírusa sem eru að stöðva mikilvæg ritgerðaskrif akkúrat þessa stundina.

Það væri nú gaman að vita hverjir eru að skoða síðuna hjá manni :D ...en þeir sem eru feimnir meiga alveg vera svona leyniskoðarar. Ég á alveg nokkrar svona síður þar sem mér líður eins og ég sé að njósna um fólk þegar ég fer inn á þær, maður veit kannski undarlega mikið um einhvern sem maður umgengst ekkert ...hehe :)

...eeeen allavegana, ég á að vera að skrifa ritgerð um skilgreiningar og kenningar um greind. Sem væri virkilega spennandi ef mín greind væri í lagi þessa stundina. Ég ætlaði mér að hakka Howard Gardner í spað, en ég á nú eftir að sjá hvernig það fer...
Ég ætti frekar að skrifa grein um sjúkdóma, ég veit held ég allt of mikið um sjúkdóma og lyf ...búin að eiga óhóflega mikið af veikum börnum í gegnum tíðina og horfa óhóflega mikið á House og bráðavaktina ...ég nota House kvöld svona svipað og aðrir nota Gettu betur kvöld, ég reyni að keppast við að vera á undan doctor House að greina sjúkdóminn ...hehe, klikk ég veit!

...nóg af rausi, set hérna nokkrar myndir fyrir fjölskylduna.
Hérna eru Þorgils, Ynja og Óðinn í heitapottinum þegar við fórum í sumarbústað um daginn.

Ynja Mist, alveg dauðþreytt að máta öskudagsbúninginn sinn! ...hún er engill ef þið sjáið það ekki ;)
Ynja og Sunna vinkona hennar, engillinn og nornin, tilbúnar til að fara að betla nammi .
Urður er aðeins að tékka á kökunni, hún þurfti að þola að horfa á nammikökuna alveg frá því að hún vaknaði og alveg til 4. Hún passaði líka rosalega vel að enginn annar myndi snerta hana, fyrst hún mátti það ekki.

Óðinn tilbúinn að blása á kertin, Þorgils fylgist alveg spenntur með!
Óðinn fékk þetta flotta svitaband frá Björk og Pétri. Hann var mættur með það á hausnum á fótboltaæfingu strax daginn eftir, og í nýju markmannshönskunum frá Þorgilsi. Hann var svo lengi að hafa sig til fyrir framan spegilinn (fullkomna lúkkið sko...) að það var bara eins og hér væri atvinnumaður á ferð!
Urður þurfti líka að prófa svitabandið

2007-03-01T11:38:00.000Z

Próftaflan var að koma ...ljós í myrkrinu! Þetta árið tekur próftaflan fullkomið tillit til 3ja barna mæðra sem eru í meira en fullu námi og hafa ekki alveg komist í gegnum allt námsefnið á réttum tíma. Ég eygi nú von um að ná prófunum þrátt fyrir allt, þar sem mér sýnist að ég ætti kannski að ná því að frumlesa lífeðilfræðina á próftímanum.

Þannig að þið þarna vírusar, inflúensur, bakteríur streptokokkar og magapestir, þið náið sko ekki að klekkja á mér þetta árið! múhahaha :D

2007-02-25T19:42:00.000Z

ohh ...ég get stundum verið svo glötuð! Ég skrapp í búðina áðan til að versla eitthvað snögglegt í matinn og ákvað nú að hringja heim og láta Ara kveikja á ofninum til að flýta fyrir. Þó svo að ég kunni símanúmerið heima hjá mér mjög vel, tókst mér einhvernveginn að hringja í vitlaust númer. Það fór svona:
Maður: "Brynjar"
Ester: (sem heldur að hún eigi alveg frábærlega fyndinn kærasta sem sé eitthvað að djóka í sér) "hahaha" (smá þögn) ..."Ariii tíhíhí"
Maður: nei, Brynjar!
Ester: "ó, úbbs ...vitlaust númer"

...þetta var alveg pínu glatað!
Svo Brynjar, ef þú lest þetta, þá biðst ég innilega afsökunar á þessu!

2007-02-24T14:24:00.000Z

Drullustuðlar eru misjafnlega háir hjá fólki. Ég myndi aldrei kalla sjálfa mig snyrtipinna, en finn samt að með árunum lækkar þessi drullustuðull og lætur mér líða frekar illa ef það er langt síðan ég hef geta tekið húsið í gegn. Börnin mín hafa frekar háan slíkan stuðul og ég hef ekki mikið verið að skipta mér af herbergjunum þeirra, reglan hefur verið sú að ef það er hreint á einhverjum tímapunkti á laugardegi, þá fá þau 100 kall fyrir nammi. Helgarnar undanfarið hafa hinvegar verið frekar ódæmigerðar, og þau hafa geta komist yfir þónokkurt sælgæti, án þess að þurfa þennan vesæla 100 kall frá mér. ...herbergin hafa semsagt ekki verið þrifin almennilega síðan á jólum. Setningar eins og "til hvers, það kemur hvort eð er strax drasl aftur", "ég nenni því ekki", "geri það á eftir" ...hefur oft heyrst á þessu heimili.

...en eins og ég sagði, allir hafa sinn þröskuld og hljóta að fá nóg einhverntíman. Einmitt þetta gerðist hjá Ynju í gær. Þegar hún var að fara að sofa sá hún tvær silfurskottur skjótast um á gólfinu hjá sér, og var allskostar ekki ánægð með þessa litlu gesti. Ég benti henni á að við hefðum nokkrum sinnum séð silfurskottur hérna inni og það hafi alltaf verið inni hjá henni, og að það sé mun líklegra að skordýr hreyðri um sig þar sem það er nóg af drasli á gólfinu til að gæða sér á. Ynja var heldur en ekki sjokkeruð og við þrifum herbergið saman, hátt og lágt, skúruðum og spreyjuðum svo smáræði af skordýraeitri í hornin í herberginu. ...allt annað líf.

Svo var það Óðinn, ég vissi að ég yrði nú að hjálpa honum líka fyrst ég var búin að hjálpa Ynju. Við þrifum herbergið, flokkuðum og röðuðum (...mamman kannski dulítið meira en drengurinn), svo herbergið var alveg glansandi fínt á eftir. Þegar ég var svo að klára að skúra kemur kappinn labbandi, stoltur á svip með veskið sitt, réttir mér 100 kall og segir: "þú ert nú svo dugleg að þú ættir að fá einhver verðlaun".

...að sjálfsögðu þáði ég 100 kallinn frá stórlaxinum, og ætla svo sannarlega að kaupa nammi fyrir hann á eftir :D

2007-02-22T22:14:00.000Z

Ég verð víst að fara að smella einhverju hérna inn svo Silja greyið geti hætt að hlæja í hvert sinn sem hún opnar bloggið mitt.

...í gær var öskudagur, með öllu sem því fylgir. Óðinn var drakúla greifi, málaður hvítur í framan með svartar klessur í kringum augun og blóð lekandi úr munnvikunum. Hárið var svo greitt fram og endaði í mjóum oddi fram á enninu. Ynja var engill, með slöngulokka í hvítum kjól og með bleika vængi og bleikan fjaðrageislabaug á höfðinu. Bleikar kinnar og gull í hárinu. Hún leit svo sannarlega út eins og engill ...ótrúlega falleg daman!

Viðtökur í verslunum voru misjafnar. Ég skrölti á milli búða með Óðni og einum vini hans. Sumstaðar var mjög hresst og skemmtilegt fólk að vinna ...sem actually nennti að veita krökkunum einhverja smá athygli. Svo var það snyrtivörubúðin þar sem fúlar kerlingar með of mikinn varalit hentu kvenmanns ilmvatnsprufum í drengina og vildu ekki fyrir nokkra muni heyra þá syngja. ...ég veit ekki alveg hvað þær telja að 6 ára guttar ættu að gera við svona ilmvatnsprufur. Ilmvatnsprufan hans Óðins lenti allavegana einhvernveginn uppí honum ...og tjáði hann mér að þetta væri ekki mjög sérstakt á bragðið.

2007-02-19T10:24:00.000Z

Hér eru ég og silja að prófa nýju tölvuna hennar Silju! Hún er roooosalega sniðug, maður gjörsamlega orgar úr hlátri þegar maður er að prófa þessa myndavél sem er á tölvunni. ...þetta er svona "had to be there" ...maður fattar ekki hvað þetta er fyndið fyrr en maður prófar sjálfur.
...eeeen allavegana , við vorum að fikta eitthvað í þessu og við ætluðum ekki að geta hætt að hlæja þegar við fengum út þessa glæsilegu mynd hér að neðan. Við hlóum svo mikið meðan við vorum að bíða eftir að tölvan tæki myndina að það liggur við að tanngarðurinn sé að fara út úr mér eins og sést á myndinni. Brosið á Silju er öllu hógværara, lítur meira svona út eins og hún sé að reyna að vera geðveikt hress, en sé kvalin af einhverjum hræðilegum sjúkdómi í raun og veru. Við ákváðum að skýra þessa mynd "tvær vinkonur, geðveikt hressar, á leiðinni á djammið".

...hér erum við samt í alvörunni á djamminu ...hí hí :D Silja er svo frábær og ég er svo heppin að eiga svona ææææðislega mágkonu ...luv jú sæta ;)

2007-02-15T14:35:00.000Z

Fjúffffff! Búin að skila pósthelvítismótdernisma ritgerðinni minni. Við Silja vorum báðar að klára hana í gærkvöldi og skiluðum svona korter í 12 í gærkvöldi. ...búið og gert! Nú þarf maður bara að bíða og vona að maður fái ekki 3 eða undir því fyrir þessa blessuðu ritgerð. Þetta er nefnilega ekki svona týpísk ritgerð þar sem maður verður pínu fúll ef maður fær 7. Ó nei! Við Silja vorum sammála um það að við yrðum alveg rosalega glaðar ef við fengjum 5, ...og hana nú! Annars er ég nú bara búin að hanga heima í gær og dag, þar sem litla skoffínið er lasið. Litla krílið situr á gólfinu með sængina sína að horfa á söngvaborg og kötturinn liggur á bakinu, útflattur eins og klessa í lazyboy stólnum. Ég skil ekki að kötturinn geti andað þegar hún liggur svona á bakinu (fyrir þá sem ekki vita þá er kötturinn á stærð við veturgamlan grís). Fólk fær alveg sjokk þegar það kemur hingað hinn ....vaaaaa!!! Hvað er þetta???... þegar það sér þetta loðna hrúgald klesst niður í lazy boyinn. ...og án gríns, kötturinn á þennan sófa! það situr enginn annar þarna. Sófinn er líka allur í hárum, þar sem kötturinn losar sig við c.a. eitt kíló af hárum á dag. Ég ryksugaði reyndar bæði sófann og köttinn á fullum styrk í gær. Kötturinn leit út eins og hann hefði lent inni í þvottavél og þurrkara eftir þetta! Gott að eiga kött sem kippir sér ekki upp við það að vera ryksugaður.

2007-02-12T22:56:00.000Z

Hvernig er hægt að detta á tvö borðhorn í einu, þó það sé ágætis bil á milli þeirra?

Hvernig er hægt að detta þó maður standi kyrr, mörgum sinnum á dag?

Hvernig er hægt að lenda í tveim varaslysum sama daginn, fyrst ná sér í smá bólgu á efri vör ...og svo á þá neðri?

...ég get því miður ekki svarað þessum spurningum sjálf, og hvað þá að vesalings Óðinn, sem er sá sem lendir í öllum þessum slysum. Hann er núna með 5 andlitsáverka. Á kinnbeininu og enninu eftir að hafa dottið á tvö borðhorn í skólanum. Á gagnauganu eftir að eitthvað dót sem einhver krakki henti upp í loftið innan um fjöldamörg börn, sogaðist á einhvern óútskýranlegan hátt akkúrat beint í höfuðið á Óðni. Á efri vörinni eftir að sami krakki henti þotu til hliðar sem sogaðist á hinn áðurnefnda óútskýranlega hátt beint í átt að andlitinu á Óðni. ...og að lokum... ég veit ekki einusinni hvernig ég á að útskýra þetta ...stórskaddaður á neðri vör, eftir að hafa á einhvern óskiljanlega, ótrúlega, furðulega óheppilegan hátt, tekist að festa buxnakeðju alveg pikkfasta í neðri vörina á sér. Hann útskýrði þetta þannig, að hann setti keðjuna upp í sig, rak tönnina óvart í lásinn, þannig að lásinn opnaðist og klemmdist bara alveg utanum utanverða vörina. Bólgin vör og klemmdur, blár og marður "varaflipi" sem stendur eins og varta út í loftið.

...og þetta gerðist þegar hann var að fara að sofa, lá einn inni í rúmi að dunda sér drengurinn!

2007-02-10T14:41:00.000Z

Nú er ég svo aldeilis rasandi hissa! Minn maður hefur nú ekki oft fengið mig til að missa andlitið, en hann var með eitthvað ógurlegt leynimakk hérna áðan ...og kom heim með stóran pakka og gaf mér ...daddaraaaa!!!! PowerBook G4 fartölvu :D ...nú þarf ég ekki að skammast mín lengur í skólanum fyrir þotuhreyfilshljóðin í gömlu tölvunni ...og slepp við frekari axlaskaða vegna þungans :D

takk takk ástin mín, þú ert bestur :D

2007-02-07T11:11:00.000Z

"Samkvæmt svokölluðum póstmodernistum skilar meðferð í sálgreiningu hvorki betri né verri árangri en aðrar tegundir af meðferð. Í raun metur hver og einn eftir sínum viðmiðum."

Takið rökstudda afstöðu til þessarar fullyrðingar og skýrið með dæmum.

Þetta er ritgerðarefnið sem ég er að vinna núna ...og nei, ég valdi það ekki sjálf!! Það fyndna er að það eru allavegana bannorð sem má ekki nota í ritgerðinni, t.d. má ekki nota orðin: framkvæma, staðlar, vil meina, þörf og endurspegla! Einnig er alveg stranglega bannað að vera með "félagsvísindajarg", Sem er ákveðinn ritháttur sem tíðkast mikið innan félagsvísinda.

spennó, spennó :D jíhaaa ...ég ætla að reyna að hafa viðhorfið hennar Silju og telja mér trú um að þetta sé skemmtilegra en að hanga í kringlunni sjúgandi sjeik, bryðjandi popp og tyggjandi tyggjó!

2007-02-06T11:42:00.000Z

Mér finnst það ekki sanngjarnt að eiga að vera að gera tvær ritgerðir og læra fyrir próf þegar mamma, pabbi og tengdamamma eru öll í bænum, hangandi í kringlunni og drekkandi sjeik.

...ég má vorkenna mér pínu!

Það svarar samt ekki spurningunni afhverju ég er ekki að læra akkúrat NÚNA, til að flýta fyrir!

skamm skamm Ester!

2007-02-05T09:22:00.000Z

Það er svo eeeerfitt þegar maður er á bókasafninu að berjast við að halda augunum opnum og halda áfram að skrifa ritgerð. Mig langar mest núna að leggjast á gólfið undir tölvuborðið (hlýtt og gott teppi á gólfinu), breiða jakkann minn yfir mig, töskuna undir hausinn og sooooofa. *Grenji, grenj* Það er svo vont að vera þreyttur, mig langar bara að loka augunum í smá stund :´(

...er að hugsa um að redda þessu með því að fara niður og drekka svona hálfan líter af kaffi!

Þarf líka aðeins að skerpa fókusinn hjá mér, ég sé alltaf allt í móðu þegar ég er þreytt og þá er ekkert voða þægilegt að lesa þessa ponsulitlu stafi sem ég er með í þessum bévítans blaðagreinum.

Kvart dagsins komið á blað!

2007-02-04T17:38:00.000Z

Nú lenti ég í því leiðindaatviki að vigtin mín, sem ég hef átt frá því ég byrjaði að búa, gaf upp öndina í gær. Þetta var bara svona venjuleg, gamaldags vigt sem kostaði sjálfsagt svona 1000 kall þegar ég keypti hana. Í gær vildi þessi vigt meina að ég væri 32 kíló ...og ég var ekki alveg að kaupa það sko. Við skruppum þessvegna í byko til að kaupa nýja vigt í dag, planið var að kaupa bara svona venjulega, ódýra vigt.

...og hvað komum við svo heim með???

jú, jú... eitthvað rándýrt tækniundur sem tók mig alveg slatta af tíma að læra á hérna áðan. Vigt sem mælir þyngd, fituprósentu og vatnsinnihald líkamans. Hægt að stilla inn í minni hæðina, aldur og kyn og svo ferðu bara inn á þína rás og mælir allt draslið. Hrikalega flott finnst mér :P

2007-01-31T17:09:00.000Z

Nú er ég komin yfir það að vera orðin 29 ára, og ætla að því tilefni að sýna ykkur 5 ára gamla mynd af mér ...á þessari mynd er ég semsagt 24 ára, tekið 2002. Ótrúlega ligeglad eitthvað! Enda örugglega búin að drekka svona 2 bjóra á myndinni, augnaráðið eins og á Ástþóri Magnússyni.

Þar sem ég er ekki búin að taka neinar myndir af mér síðan ég varð 29, læt ég fylgja með mynd síðan ég var 28 ára ...enda leiddi hrukkutalning í ljós að það hefur ekki bæst mikið við síðan ég var 28. En ég ætla samt að koma þau ráð sem nýtast mér best í baráttunni við hrukkurnar. Nr. 1 er hárið ...það sjást engar hrukkur með svona hár. Nr. 2 eru sólgleraugun ...alltaf að hafa sólgleraugu. Nr. 3 er að vera fölur ...það er töff. Nr. 4 er að eyða frekar í föt en hrukkukrem ...best að nota bara eitthvað drasl eins og vaselín eða eitthvað. Nr. 5 er að vera ekki með vesen og leiðindi og ekki reykja ...það er vesen og leiðindi. Nr. 6 er að vera töff ...ég er t.d. mjög töff!

2007-01-26T14:41:00.000Z

Ég er mjög oft að læra inni í bókhlöðunni, sem er bókasafn Háskólans. Þar inni er alltaf mjög hljótt og öll minnstu hljóð geta valdið miklum usla og illum augnaráðum. Ekki besti staðurinn til að losa sig við óæskilegt ristilgas á. Það var nú samt einmitt það gerðist í gær þegar einhver missti óvart frá sér kröftugt prump! Hið ótrúlega var að enginn leit upp, heldur létu allir eins og ekkert hefði í skorist og héldu áfram með lesturinn í þrúgandi þögninni sem fylgdi í kjölfarið.
Aftur mætti ég á hlöðuna í morgun, og þá gerðist svolítið ótrúlegt. Þessi prump-atburður í gær, virðist hafa komið af stað einhverri prump-bylgju innan hinnar háttsettu stofnunnar sem bókasafn háskólans er! Ég heyrði hvorki meira né minna en tvö prump í morgun! Annaðhvort er þetta alltaf sama manneskjan (sem er einhver sem ekki ber virðingu fyrir óskrifuðum reglum), eða þá að manneskjan sem prumpaði fyrst hefur sett eitthvað fordæmi fyrir hina. "já, það prumpaði nú einhver hérna í gær! ...hlýtur nú að vera allt í lagi að ég sleppi þá út smávegis!")
Fólk sýnir enga virðingu nú til dags! engaaaa virðingu!

En nú að allt öðru: ég á afmæli á morgun og af því tilefni ætla ég að skella í nokkrar tertur. Ég tek það fram að það er hægt að hafa kveikt á sjónvarpinu (ef það eru einhverjir handboltafíklar á svæðinu)! ...ég verð 29 ára og það þarf ekki að koma með aðgangseyri, en vinir og vandamenn væru vel þegnir ;)

2007-01-24T17:08:00.000Z

...stundum bara fallast manni hendur!
Þegar ég kom heim í dag, tók á móti mér stöðuvatn inni í húsinu mínu. Vinkona hennar Ynju hafði skrúfað frá krana og gleymt að skrúfa fyrir aftur. Nú hlýtur okkur bara að verða sagt upp tryggingunum hjá VÍS, hver vill svona vesenisfólk? Fyrir þá sem ekki muna, þá flæddi líka sjóðandi heitt vatn í miklu magni inn í bílskúrinn okkar í sumar.
...og þó það sé bjánalegt, þá finnst mér það alltaf meira spælandi að þetta voru í hvorugt skiptið mín börn ...einhvernveginn held ég að maður sé sáttari ef þetta eru manns eigin afkvæmi, þá getur maður allavegana pínu sjálfumsér um kennt.
Ég er með harðsperrur í höndunum eftir að vinda handklæði, og illt í höfðinu af öllu jafnaðargeðinu sem ég skvera fram þegar eitthvað svona gerist. Sagði náttúrulega stelpugreyinu að þetta væri bara slys og svona gæti gerst (milli samanbitinna tanna)! ...svo fer ég bara í kvöld og rústa einhverju á afskekktum stað með beisball kylfu ;) ...eða ef einhver vill láta berja sig, þá bara hafa samband (nema ef Gummi Byrgis er að skoða þetta, þá er ég ekki að meina svoleiðis sko...)

2007-01-23T22:52:00.000Z

Það er orðið alltof alltof aaaalltoflangt síðan ég hef skrifað hérna. Skamm skamm Ester, ekki nógu dugleg!
Mér finnst vera mikið að gera, tíminn flýgur og svo á ég afmæli á laugardaginn og veit ekki alveg hvort að ég á að vera í fýlu yfir því eða ekki. Síðasta árið sem ég verð tuttuguogeitthvað, þ.e. ég verð 29 ára. Held samt að ég verði tuttuguogtíu næst, vill allsekki segja þetta hitt sem byrjar á "þ". Er ekki einhver með góða hugmynd hvað maður á að gera á afmælinu til að létta sér lífið? Um að gera að skrifa bara nafnlaust ef maður er feimin ;)

Annars ákvað ég nú að tékka pínu á "Ester" á google, þar sem ég á nú afmæli bráðum. Það kom upp eitthvað efnasamband, sem tengist sjálfsagt Ester- c vítamíni. Svo kom upp einhver brjóstaber kona (ekki ég samt), og svo kom upp Ester the brownie, sem ég verð að sýna ykkur mynd af. Þetta er svona húsálfur, eins og ég.
Ég komst líka að því að það er til hótel í Krakow sem heitir Ester. Ég þarf endilega að skella mér þangað. Svo verð ég endilega að fara að plana næstu ferð til Alaska, í bæ sem heitir Ester og hefur 1680 íbúa. Svo er líka til stóll sem heitir Ester, og spænsk barnabók. Þetta er allt alveg mikið athyglisvert! Ég hef lært margt nýtt í dag!

2007-01-19T09:22:00.000Z

Bendi öllum, hvort sem þeir hafa séð hið fræga Guðmundarmyndband eður ei, að lesa þessa lýsingu ...þetta er ógeðslega fyndið :) http://www.mengella.blogspot.com/ Teprur og viðkvæmir að passa sig á þessu samt!

2007-01-17T16:40:00.000Z

Jeminn hvað ég er ekki að standa mig í þessu bloggi núna! Skólinn er bara byrjaður og maður er að reyna að byrja með trompi og halda svolítið góðu dampi. Ég er líka búin að komast að því að ég þarf að skrifa 5 ritgerðir og gera eina rannsókn í vetur, þannig að það er nú eins gott að standa sig og halda plani! ...og já, upplýsingar fyrir Önnu Kristjönu sem þolir ekki hálfkveðnar vísur þá fékk ég 8 í klínískri sálfræði, 5 í sögu sálfræðinnar, 6 í tölfræði og 8,5 í skýringum á hegðun. Þar hafið þið það. Það er svooo ljótt að fá 5 og 6 ...samt bara fegin að vera búin með þetta!

2007-01-12T10:26:00.000Z

Ég er að reyna að læra á þessa blessuðu videovél sem við eigum, ég ætla að reyna að fara að koma þessu yfir á tölvuna svo ég geti kannski sett einhver stutt myndskeið inn á síðuna. Tilgangslaust að vera að taka eitthvað upp ef það liggur svo bara á spólunum inni í skáp!
Í dag er síðasti virki frídagurinn minn, því skólinn byrjar af fullum krafti á mánudaginn. Mig er bara farið að langa að byrja í skólanum, það er alltaf svo gaman þegar maður er að byrja í nýjum kúrsum. Ég verð núna í Þroskasálfræði, persónuleikasálfræði, lífeðlislegri sálfræði og öldrunarsálfræði. Þetta eru 17 einingar (fullt nám er 15) ...hehehemm ...ég á nú eftir að sjá hvernig það gengur :/ ...og já, ég náði öllum prófunum. Tvö voru frekar lásí hjá mér, en ég var rosa ánægð með það síðasta, það bætti alveg upp fyrir hin tvö ;)

Smá saga af Skoffíninu:
...Urður er ekki bara sjúk í nammi og finnur lykt af því í hundraðmetra fjarlægð, heldur er hún líka sérfræðingur í notkun þess. Við Óðinn vorum með tyggjó í gær og ég leyfði Óðni að gefa Urði hálft tyggjó, þar sem hún var alltaf tuðandi "giggó, giggó". Ég bjóst nú við því að það yrði komið góða leið niður meltingarveginn stuttu síðar. En viti menn! Barnið veit bara alveg hvernig á að tyggja tyggjó og tuggði það eins og fagmaður í a.m.k. klukkutíma! ...eftir það veit ég ekki hvað varð af tyggjóinu.

2007-01-09T10:12:00.000Z

jæja, nú verð ég að taka áramótablogg ...þó seint sé í rassinn gripið. Mætt í árabótaboðið okkar voru:

Dorrit:Ólafur:

og Ágústa Jhonson:
og Svo vorum við fjölskyldan hér líka ...að sjálfsögðu. Við borðuðum dásamlega humarsúpu og kalkún, vínið draup og bjórinn freyddi.

...svo er það áramótaskaupið...

sem ég hef í flestum tilfellum heyrt fólk úthúða! Ég er kannski lúði með aulahúmor, en mér fannst alveg ansi margt fyndið og við veltumst öll um úr hlátri hérna í stofunni hjá mér. Mér fannst t.d. ógeðslega fyndinn krakkinn sem var búinn að taka magnificent koffíntöflur ...og "sexiest buissnessman in the world" keppnin ...og textahöfundurinn (hjá Sigurrós) ...og reyndar hló ég ógeðslega mikið af "Ólífur Ragnar Grímsson" atriðinu ...og svo fannst mér hrikalega sniðugt atriðið í endann með orkuveitu auglýsingunni (Þorsteinn og dvergurinn), og ég ætla að enda þetta blogg með tilvitnun í textann í laginu. "...Svona viljum við vera, feit og heimsk og drukkin"

svo verð ég nú að láta fylgja nokkrar jólamyndir:

2007-01-05T12:11:00.000Z

Ég veit ég er búin að vera alveg hræðilega löt að blogga, sorrý! Núna er lífið svona aftur að skríða í eðlilegt horf, fyrsti skóladagurinn í dag hjá Ynju og Óðini. Þau eru búin að vera í ströngum æfingabúðum þessa vikuna, að æfa sig í að vakna á morgnanna. Ég vakti þau upp úr 10 á þriðjudaginn, 9 á miðvikudag og svo 8 í gær ...rosalegt plan á ferðinni þarna! Ég hef samt aldrei vitað um neinn sem sefur í þvílíku dauðaroti eins og Óðinn. Hann vaknar ekki þó maður sé byrjaður að hrista rúmið hans til og búinn að hækka útvarpið í botn.
Það er eiginlega bara eitt sem virkar til að vekja hann, það er ef eitthvað spennandi eða nýtt er í gangi t.d. var ég að kaupa ný föt á hann og gat því sagt "Óðinn, ætlar þú að koma í nýju fötin þín?" -þá tekur minn alveg kipp og rís upp, þó hann sé ennþá sofandi, og segir í svona hálfgerðu óðagoti með rámri röddu: "já, komdu með peysuna mína og svörtu buxurnar".
Þannig var t.d. líka hægt að nota -"ertu búinn að gá í skóinn?" "bekkurinn þinn fer í leikhús í dag" "ætlar þú með nýju litina í skólann" "það er leikfimi í dag" "það er slátur í matinn í kvöld" ...og eitthvað annað álíka sem ég læt mér detta í hug og læt það hljóma eins og það sé mjöööög spennandi, málið er að hitta á rétta punch-lænið þann daginn :D
Ynja er hinsvegar orðin mjög snögg að vakna á morgnanna, hún þarf bara smá knús og þá er hún vöknuð.
Skoffínið sprettur upp eins og gormur með bros á vör og þreytt augu og kallar hátt: babbi, mamma, nana, óvi. Hún er alltaf með alveg hrikalegan prakkarasvip á sér þegar hún vaknar, hress á kantinum!

...við Ari sofum bara lengur við hvert tækifæri sem gefst, við eigum bæði alveg óskaplega erfitt með það að standast freistinguna að sofa lengur ...helvítis snúsið alltafhreint!

jæja, þá vitið þið það ...hreint aldeilis nýtilegur fróðleikur hér á ferð!

2006-12-29T14:14:00.000Z

Hellúú´:) Er bara stödd á Hólmavík eins og er og er bara aðallega að slappa af (eða reyna það) þó að yngsta skoffínið sé reyndar ekkert alveg á því að leyfa mér það! Hún er búin að vera frekar kvefuð og lasin, heimtar að byrja aftur með pela og neitar að sofa. Ég er búin að fá tvær einkunnir, fékk 8 í klínískri sálfræði og skammarlega sexu í tölfræði 3, sem ég átti nú kannski alveg skilið að fá! ...ég var orðin frekar þreytt og kærulaus þegar ég fór í það próf.
...ég nenni nú ekki að pirra mig lengi yfir því og held bara áfram í minnni barnslegu jólagleði hérna á Hólmavík!
Annars er ég pínu búin að vera að bögga hann Ara minn í sambandi við áramótamatinn, þar sem við verðum í fyrsta sinn ábyrg fyrir áramótaboði og ég held að við séum búin að sættast á humarsúpu og kalkún, það ætti nú að vera herramannsmatur fyrir hvern sem er :D ...svo er ég búin að kaupa svolítið spennó sem ég hef aldrei séð áður, en það eru finlandia kúlur ...daddara, spennó spennó fyrir þá sem koma í áramótaboð til mín ;)

Áramótakveðja: Ester

2006-12-24T16:01:00.000Z

Jæja, hérna koma smá jólamyndir:

Jólatréð okkar!

Urður í jólabaði!

Ynja í jólaskreytinganefnd:

og Óðinn í jólaskreytinganefnd:

Allt gengur í fína með jólaundirbúninginn, fyrir utan það að Urður greyið er komin með hita og verður sennilega ekki í eins miklu stuði í kvöld og við var að búast. Ég ætla að reyna að setja inn myndir af jólapakkaopnun í kvöld :) ...Óska annars bara öllum gleðilegra jóla :D

2006-12-24T14:02:00.000Z

Það er búið að vera að biðja okkur um glögg uppskriftina hans Ara, uppskriftin hljóðar svona:

Jólaglögg Ara:

Slatti af rauðvíni
dass af kanil
dass af engifer
svona á bilinu dass til slatti af púðursykri, allt eftir smekk
hnefafylli af möndluflögum
og smá rifinn sítrónubörkur

Verði ykkur að góðu :D
...ef þið viljið nákvæmara, þá leitið þið á netinu :D

2006-12-22T23:34:00.000Z

Húsmóðurgenin hafa fengið örlitla uppreisn æru eftir að ég kláraði prófin. Mér tókst að baka eina smákökusort, brenndi reyndar síðustu plötuna sem er nú ekkert nýtt ...ég geri það ALLTAF! Svo er ég búin að vera að þrífa (segi ekki hátt og lágt, en eitthvað allavegana), og svo þurfti ég nú heldur betur að sanna mig og taka fram saumavélina þar sem jólakjóllinn hennar Ynju var heldur víður á hana.
Það er frekar langt síðan ég saumaði síðast og ég áttaði mig á því þegar ég opnaði saumavélina hennar Silju að ég kunni bara ekkert á þetta apparat! Ég stóð þarna með tvinnann og gat bara engan veginn fundið út hvernig í ósköpunum átti að þræða blessaða vélina. Kemur þá ekki hún Ynja mín askvaðandi og segir frekar mæðulega: "ég skal gera þetta", hún snarar svo bara tvinnanum í á nó tæm!!! (tek það fram að þarna fengu húsmóðurgenin vægt sjokk) -segið svo að grunnskólanámið nýtist manni ekki :D

...annars erum við Ari bara að glöggva okkur aðeins núna á heimatilbúnu jólaglöggi, börnin komin í ból, og verið að skrifa innkaupalista ...voða notó ;)

2006-12-21T15:42:00.000Z

jibbí jeiiii!!! Loksins er ég búin í prófunum! Ég var svo spennt að komast út úr prófinu að ég er ekki frá því að ég hafi flýtt mér aðeins. Ég fór svo að sækja Óðinn niður í reiknistofu (þurfti að vera í vinnunni með pabba sínum meðan ég var í prófinu), og það var vissulega stórkallalegt að sjá Óðinn labba út úr seðlabankanum með fartölvutöskuna á öxlinni, hann var svona eins og lítill viðskiptafræðingur ...hehe :D

Við fórum svo heim og skrifuðum jólakortin á ljóshraða ...svo fyrir þá sem fá kortið frá okkur seint, eða fá tómt umslag með nafninu sínu utaná, eða eitthvað annað nafn er inni í umslaginu en utaná því ...æm só sorrí :/ það er þó allavegana mynd af krökkunum með kortinu.

...nú er ég að jólastússast alveg á fullu ...baka og hafa það jolly ...allir velkomnir í kaffi :)

Jólakveðja: Ester

2006-12-17T12:11:00.000Z

hei hei! Ekki mikið verið skrifað hér inn nýlega. Ég er ekki alveg búin í prófunum, þó mér sé oooof mikið að líða eins og ég sé búin ...ég þarf virkilega að taka á þessu á mánudaginn! Jólapakkarnir eru að byrja að hrúgast inn, kom t.d. sending frá Danmerkurkrúttunum okkar áðan, og það var mikil spenna að opna kassann og sjá pakkana sem vori inní :D Við ætlum að fara á eftir að kaupa jólatré, og svo er söngfuglinn hún Ynja að fara að syngja í Háteigskirkju klukkan 4 í dag ...allir velkomnir og frítt inn!

2006-12-11T19:55:00.000Z

Spurningar dagsins: Afhverju er Óðinn í plastpoka?Svar: Þetta er Óðinn á leiðinni í skólann og þetta er hans eigin hönnun!

Afhverju er barnið með fælnina hjá þessum rauðklædda manni?

Svar: ...??? ég bara skil þetta ekki! Líklegasta skýringin er þó líklega þessi:

Svo er hérna ein af Ynju sætu:

...annars er það bara af mér að frétta að ég er búin í tveim prófum af fjórum, var að koma úr svakalegri törn núna ...þannig að það er bara rauðvín og chill í kvöld ;)

2006-12-08T14:47:00.000Z

jæks! Saga sálfræðinnar á morgun! Minn mesti akkilesarhæll þetta árið. ...mér finnst ég rugla öllu saman af þessum 100 köllum og 100 stefnum (ég held bara að þessar 1.300 blaðsíður komist ekki fyrir inni í mínum litla haus) ...ég verð bara að vona að 47.5% af efninu sé þarna einhversstaðar! ...plís plís plís, langar alveg innilega ekki að taka þennan kúrs aftur!

2006-12-05T18:27:00.000Z

Ég ætla að fá mér nýja úlpu. Úlpan sem ég keypti (vegna fjárhagslegrar neyðar á sínum tíma) í barnadeildinni í hagkaup er ekki að gera góða hluti þessa dagana! Ég var að labba heim úr strætó í dag og mætti krökkum sem eru aðeins eldri en Ynja, og þetta er það sem gerðist (tek samt fram að það var myrkur úti):

Krakki: "hæ"

Ester: "halló"

Krakki: "í hvaða bekk ertu?"

...á mér að finnast þetta fyndið, eða á ég virkilega að íhuga að fá mér kápu og permanett? Ég fer allavegana aldrei í þessa úlpu aftur, þó það sé kalt úti!

2006-12-03T00:03:00.000Z

Bara svona svo ég geti sagst hafa gert jóla - eitthvað. Allavegana búin að setja þessa fínu jólamynd á síðuna mína.

Annars gekk bara dagurinn í dag út á það að læra og kjósa í prófkjörinu. Svo borðuðum við á Quisnos í kvöldmatnum ...mataræðið ekkert að breytast á þessu heimili. Urði fannst alveg frábært að vera í boltalandinu, það rétt sást í trínið á henni og stundum hvarf hún alveg ofaní boltana. Hún skríkti og hló þegar Ynja var að renna með hana í rennibrautinni og fannst alveg frábært að sjá lætin í krökkunum.

...hún er samt farin að skæla stundum þegar ég er að fara (alveg til að auka samviskubitið) ég verð líklega bara að trúa því sem stendur í þessum skruddum sem ég er að lesa! Eina leiðin til að losna við aðskilnaðarkvíða er "frequent exposure". Þ.e. því oftar sem hún þarf að horfa á eftir mér, því fljótar hættir hún að væla ...svo framarlega sem ég styrki ekki vælið t.d. með athygli. hehe ...smá sálfræðihúmor hérna! :D ...spurning hvort hún verði svo bæld og vanrækt í framhaldinu! (fræðsla í boði Seligman, Poultson, Menzie og Freud)

Gvöð ...ég er næstum hneyksluð á sjálfri mér ...eitthvað segir mér að ég sé búin að lesa of mikið undanfarna daga!

kveðja úr heimi klínísku sálfræðinnar - Ester

2006-11-29T16:41:00.000Z

Það lýsir vel ástandinu á heimilinu þessa dagana það sem hin ofur-hreinskilna dóttir mín sagði við mig í gær, með mikinn hneykslunarsvip á andlitinu:

"mamma!, við höfum ekki fengið neitt nema eitthvað ruslfæði hérna undanfarna daga!!"

Þetta er eiginlega alveg rétt hjá henni, blessuninni, þar sem mamman er lærandi við hvert tækifæri, sinnir aðeins brýnustu heimilisstörfum eins og að sjá til þess að til séu sokkar og hreint leirtau, og eldar tómar pulsur og pakkapasta! (...ég veit ekki alveg hvað varð af pabbanum á heimilinu, en eitthvað finnst mér eins og ég hafi séð hann lítið undanfarið ...kannski er það bara af því að ég er annarshugar og voða bissí eitthvað :) Ég er samt að hugsa um að reyna að taka einn verslunardag um helgina, ég er búin í prófunum 21 des og sé framá að eiga þá eftir að þrífa allt ...ehh ...gangi mér vel! Koma ekki jólin annars alveg þó það sé ekki hreint í öllum skúmaskotum?

...það góða við skammdegið er að þá sést rykið ekki eins vel, og ef maður slekkur líka og kveikir á kerti ...þá virðist allt vera voða fínt bara ;D

Planið í bili er semsagt að slökkva ljósið og kveikja á kerti

Ég verð nú líka að þakka mömmu og Heidí systir fyrir að bjarga afmælinu hennar Ynju um daginn ...það hefðu verið tómar jóa-fel kökur ef þær hefðu ekki reddað þessu ...eða eins og Ynja orðaði þetta í símann við ömmu sína ..."mamma er ekki búin að gera neitt!! *hneyksl*" ...yndisleg, þessi elska.

...jólakveðja: Ester :D

2006-11-27T16:29:00.000Z

Ekki nóg með það að ég eigi ömmu sem bakar bestu kleinur og bollur í heimi, heldur á ég líka ömmu sem er hraust, dugleg og tekur afstöðu. Ég sá mynd af ömmu minni á netinu í dag, þar sem hún var að taka þátt í leik. Þessi leikur heitir "yfir" og fólk á Hólmavík hópaðist saman til að spila hann yfir gamla barnaskólann á Hólmavík, til að mótmæla niðurrifi hans. Ég er hjartanlega sammála ömmu minni, sem og fleirum, í þessu máli, og er algjörlega á móti niðurrifinu. Amma mín er alveg yndisleg og ég er ótrúlega stolt af henni!! Greinin á netinu er hér og þeir sem vilja kynna sér umræðurnar, geta séð þær hér

2006-11-25T21:58:00.000Z

Ég verð nú að segja að tölfræðileg þáttagreining er eitthvað sem ég mæli ekki með! Ég er búin að vera nonstop í 8 klukkutíma að klára síðasta skilaverkefnið mitt á þessari önn. Ég er líka mjög stolt af því að hafa öðlast einstakan hæfileika til að útiloka utanaðkomandi áreiti þegar ég er að vinna. Það voru semsagt 4 börn hér í allann dag, mín þrjú og svo Þorgils hennar Heiðdísar ...og ég get nú sagt ykkur að það er ekkert rosalega hljóðlátt þegar þessi "yndislegu og ljúfu" börn koma saman. ...annars, húrra fyrir því að sjá fyrir endann á þessari önn, ég er strax byrjuð að skála í rauðvíni ;)

2006-11-20T22:30:00.000Z

Rosa gaman að leika úti í snjónum. Hér eru Ynja, Óðinn og Urður, ásamt Telmu vinkonu úr húsinu á móti.
Þegar ég var að fara að sækja Urði til dagmömmunnar í dag, sá ég hvar gömul kona var að reyna að ýta bíl annarrar gamallar konu, þar sem bíllinn sat fastur í skafli. Alveg týpískt fyrir Reykvíkinga að keyra bara framhjá þó að sjötug kona sé ein að reyna að ýta bíl. Það eru bara svona landsbyggðalúðar eins og ég sem stoppa til að hjálpa. Ég lagði líka bara bílnum mínum á miðja götuna og var bara skítsama hverja ég var að tefja og trufla. Það tók þrjár tilraunir að ná bílnum úr skaflinum ...og nota bene: umferðin öðru megin var stopp á meðan, en samt fór enginn út úr bílnum til að aðstoða! Sjáandi það að þarna var ein gömul kona og einn dvergur að ýta ...djöfulsins pakk!!
Ég man nú þegar maður bjó úti á landi, þá var maður ekki fyrr búinn að festa sig en einhver var mættur með kaðal, skóflu og bros á vör :D
Þrefalt húrra fyrir landsbyggðinni!!!

2006-11-19T13:24:00.000Z

Allt ófært í höfuðborginni! Það er eiginlega bara orðið langt síðan maður hefur séð almennilegan snjó ...ég held meira að segja að Ari hafi komist í smá jólaskap við þetta. Ég fer alveg í sveitafílinginn, er bara á náttbuxunum og lopasokkum og skellti í pönnsur fyrir liðið mitt sem var búið að vera úti að moka innkeyrsluna. Voða kósí að fá smá storm af of til. Ég þyrfti nú eiginlega að setja inn nokkrar snjómyndir handa útlandabúunum okkar. Er ekki annars bara snjólaust í Danaveldi?

2006-11-17T17:34:00.000Z

Hér koma umbeðnar hárgreiðslumyndir, þó það sé nú ekki búið að gera neina töffaragreiðslu í hann þarna ...bara svona venjulegt skóladagshár :D Annars eru Óðinn og Urður hérna að leika sér í dýnuhúsi sem við gerðum á ganginum hjá kattahliðinu. Nýjasta nýtt hjá Urði núna er að fara afturábak og troða rassinum í gegnum gatið fyrir köttinn, og svo situr hún þar föst ...og gerir þetta samt aftur og aftur og aftur. Sá sem fann upp máltækið "brennt barn forðast eldinn" hefur alveg örugglega ekki átt barn sjálfur!

2006-11-16T17:41:00.000Z

Án gríns ...það er ekki hægt að vera pæja í svona veðri. Ég held að það sé alveg málið að vera í lopapeysu, lopasokkum og með hettu ...undir sæng að lesa klíníska sálfræði. Svo ef maður þarf að skreppa út er um að gera að troða sér í úlpuna utanyfir þetta alltsaman og vefja um sig stórum trefli ...það er líka svona "extremely bad-hairday" hjá öllum held ég, á svona dögum. Ég var einmitt með hann Óðinn minn í klippingu í dag og hann var í miklum vandræðum. Það var ógeðslega kalt, en hann gat samt ekki sett á sig húfu af því að þá náttúrulega skemmist nýja hárgreiðslan ...þannig að af tvennu illu valdi hann frekar að vera kalt ...enda nýbúið að skella fullt af geli og spreyi í hausinn á honum, og hann alveg með smælið út á kinnar yfir nýju hárgreiðslunni. ...maður er nú ekki töffari fyrir ekki neitt!!

2006-11-14T11:46:00.000Z

Jólin, jólin, jólin koma brátt... jú, víst! Jólin eru víst að koma bráðum, og ég er sko búin að kaupa jólapappír, 7 og hálfa jólagjöf, og smá jólaskraut. Mér finnst jólin alltaf svo skemmtileg og er bara farin að hlakka til alls jólastússins. Ég hefði nú samt ekkert á móti því að fá einhvern til að gera jólahreingerninguna fyrir mig, þar sem ég er í prófum til 21. desember. ...sjálfboðaliðar ...einhver??

Hérna er mynd af Urði og kettinum í litlu dúkkurúmi sem er gjörsamlega búið að liðast í sundur, af því að þær eru alltaf að leika sér ofan í því, og rífast svo í þokkabót og reyna að bola hvor annarri úr rúminu. Þær eru svei mér þá nánast eins og systur!

Svo er hún Ynja mín svo dásamlega dugleg barnapía, leikur við systir sína og les fyrir hana, þó hún verði stundum þreytt á því að sú litla komi í herbergið hennar að tæta allt upp úr skúffunum. Hún er á alveg mesta tætualdri í heimi ...ég skil ekki hvernig sumir ná að halda öllu tipp topp með barn á þessum aldri, ekki get ég það allavegana.

Vantar ekki einhvern þarna úti góðan rafmagnsgítar?? Ari vill selja einn af sínum sem er Fender Telecaster special edition, rosa flottur og góður gítar. Og fyrir þá sem vantar að gefa gítar í jólagjöf, þá er miklu betra að gefa góðan notaðan gítar, en að kaupa einvhern drasl nýjan sem er ódýr. ...og hér er mynd af dýrgripnum!

2006-11-09T17:17:00.000Z

Algjör klúðurs dagur í dag. Ég er búin að vera eitt gangandi stórslys í dag og ætti helst að vera uppi í rúmi með hjálm. Ekki allavegana biðja mig um aðstoð við neitt í dag, því ég mun pottþétt klúðra því einhvernveginn. Ég er með saumó í kvöld og bjó til kökubotna sem ég hef oft búið til áður og þeir m0lnuðu gjörsamleg niður í öreindir þegar ég ætlaði að taka þá úr mótinu.

Nú jæja ...eitt klúður, hvað er það svosem.

Heyrðu, svo ætlar fröken fjölhæf að gera marga hluti í einu, rista haustkex á pönnu ...og læra svolítið í leiðinni (gáfulegt Ester ...mjöööög gáfulegt). Ég lærði aðeins of mikið ...lærði tildæmis að það kemur MJÖG mikill reykur þegar haustkex brennur á pönnu. Ég flúði út til að fá ekki reykeitrun og fékk kaffi og áfallahjálp hjá nágranna mínum. ...afhverju ég fann ekki lyktina strax er óútskýranlegt!!

...auk þess búin að: brjóta einn bolla, hella niður kaffi, hella niður gamalli sósu úr ísskápnum (ætlaði að rýma aðeins til í ísskápnum), ég þurfti að fara í 4 búðir til að finna Kiwi í eina kökuna ...hvergi til kiwi, greinilega ekki sá tími ársins :P, ég er búin að reka höfuðið tvisvar í skápa, hella vatni á peysuna mína, missa desilítramál með flórsykri í ...þegar ég ætlaði svo að skrifa um ófarir mínar, var bloggið bilað.

2006-11-05T19:20:00.000Z

Koltvísýringur í andrúmsloftinu hefur aldrei áður verið meiri en nú ...vinsamlegast hættið (þið sem vitið upp á ykkur sökina) að hita upp bílinn ykkar á morgnanna og skilja hann eftir í gangi meðan þið hlaupið í búðina og svona.

Það er skárra að vera kalt í 5 mínútur, en að valda því að barnabörnin ykkar eigi eftir að deyja í flóðum og náttúruhamförum.

...og þeir sem halda að þetta sé kaldhæðni eða djók, þá er það vitlaust hjá ykkur! ...og hana nú!!!

2006-11-04T18:41:00.000Z

Búin að breyta baðherberginu fyrir fimmðúskall og það tók bara 5 mínútur!

Hvað ætti ég svo að taka næst? Mig langar held ég svolítið að fara að klára ganginn, þ.e rífa teppið úr stiganum og setja steinteppi, sem er víst það sem við teljum heppilegast í dag. ...eeen það felur víst í sér að ég þarf hjálp frá Ara, þannig að það gæææti dregist á langinn. Ég næ nú samt oft að pína hann í að gera eitthvað, þegar ég hef í minni fljótfærni farið og keypt eitthvað og bara byrjað! Hann treystir mér nefnilega ekki alveg fyrir að gera hlutina RÉTT sko... Hann getur allavegana bókað það að einhvern daginn þegar hann kemur heim úr vinnunni er bara *úps* teppið farið af stiganum og komið fullt af einhverju "steinteppisefni" sem bíður eftir því að stökkva á gólfið ...hehe :D

...og já ekki hafa áhyggjur, ég held að Ari lesi ekki einusinni bloggið mitt. Og ef hann skyldi nú slysast til þess, þá hlýtur hann nú að skilja eftir komment ;)

Kveðja: Ester -sem er alveg með eindæmum hress þessa stundina-

2006-11-03T16:57:00.000Z

Voða voða mikið að gera núna ...próf á morgunn, tíminn flýgur og mér finnst ég alls ekki vera búin að læra nóg. Ég fór með krakkana áðan að taka videospólu, svo að ég sé nú ekki bara leiðinlega mamman sem lærir og segir "uss krakkar" ...ég á nú samt svo klára krakka. Urði tókst áðan á videoleigunni á ná sér í kinderegg úr einni hillunni og bíta í það, ekkert smá ánægð með sjálfasig þar! ...hún er mjög efnileg í namminu held ég.

2006-10-30T11:33:00.000Z

Jesssss! búin með heimaprófið. Búin að vera puðandi við þetta alla helgina ...með góðum hléum þó! Þessi próf eru samt alveg óþolandi, manni finnst eins og hafi gengið rosa vel og heldur að maður sé að fá 7 eða 8, en svo fær maður örugglega skitna 4 eða 5. ...ég held bara hreinlega að ég kunni ekki að taka svona heimapróf :P (...sem hlýtur að vera ástæðan afþví þið vitið öll að ég er alveg sérlega gáfuð manneskja ;)

...maður verður bara að vona það besta! jæks!

2006-10-25T15:44:00.000Z

Hólmavík eða ekki Hólmavík ...það er spurningin. Ég er að berjast við það núna hvort að ég eigi að skella mér um helgina eða ekki. Ég er reyndar að fara í heimapróf um helgina, en mamma er búin að lofa að ég fái tíma til að klára það. Systur mínar verða á Hólmavík um helgina, sem er gaman. ...svo er það hálkan, ég er ekki að nenna að setja vetrardekkin undir strax, þar sem það er ekki vetur í Reykjavík (eða allavegana ekki í Kópavogi). ...mamma reyndar heldur því fram að færðin sé að skána. Svo er einhver hittingur hjá bekknum hans Óðins á sunnudaginn og líka fótboltaæfing, sem hann myndi þá missa af.

...ohh, ég má ekki vera að hanga svona á netinu. Urður er búin að tæta alla blautklútana uppúr pakkanum! ...ekki í fyrsta sinn :/

2006-10-20T19:41:00.000Z

Þá er það ferðin ...vú´hú ...þvílíkt stuð! Verst að megnið af myndunum eru ekki birtingarhæfar svona á netinu. Þessvegna byrja ég bara á því að setja inn dönnuðustu myndina ...þar sem við erum í sjoppinu. Við vorum náttúrulega í alveg svakalegu stuði og djammað stíft öll kvöldin. Fórum tvisvar alveg rosalega flott út að borða (...alltaf í stuði samt) ...ég held að sumum hafi ekkert verið farið að lítast á okkur, margir alveg gapandi hissa yfir því að við ætluðum að drekka öll kvöldin ...hehe :P ...eeeeen nokkrar djammmyndir svona í lokin.
...gellan með gelludrykk.

Hildur , Helga, Anna og Ester ...svaka stuðpíur!
Ester og Gunna að fjármagna ferðina ...haha :) ...neeee, reyndar gert svolítið mikið af því að tala á milli herbergja, þó svo að við höfum nú alveg heyrt í hver annarri í gegnum vegginn (og séð hvor aðra á klóinu, af því að það var bara svona glerveggur ...rosa nýmóðins :PLjóskurnar í hópnum, Sunna og Ester

2006-10-12T17:53:00.000Z

Jæja! Þá er komið að því. Á morgunn legg ég af stað í hina miklu verslunar og bjórdrykkjuferð til þýskalands. ...þannig að ég á ekkert eftir að skrifa fyrr en í fyrsta lagi á þriðjudaginn og get þá vonandi sýnt ykkur einhverjar myndir frá ferðinni ef þær verða birtingarhæfar.
Auf Widershen ...eða hvernig sem það er nú skrifað :P ...þeir sem telja sig þýskusnillinga meiga leiðrétta mig ef þeir vilja.

2006-10-10T12:23:00.000Z

Ekkert mál Björk mín! ...auðvitað set ég inn mynd af þér. ...reyndar síðan þú varst 12 ára, eh hva! Þetta ert nú samt þú :D ... ... ... ... ... ... ... ... ... hahaha ..oj, oj, oj ...ég er svo leiðinleg að ég á ekki einusinni skilið að eiga systur, en ég bara varð!

2006-10-10T11:16:00.000Z

jæja, er ekki kominn tími til að skella inn myndum bara! Hér erum við skötuhjúin þegar við sluppum út að borða með Halldóri frænda og Evu. Við fórum á Madonnu, og fengum bara alveg fínindis mat :D

Svo er það Óðinn dúlla, með lubbann sinn! Þarna er hann ennþá svolítið slappur eftir aðgerðina, grey kallinn!

Urður dúlla í nýju úlpunni frá ömmu, niðri á Kópavogstjörn að gefa öndunum brauð. Það var ekkert smá stuð, hún skellihló í hvert sinn sem ég henti brauði út í vatnið, það er svo dásamlegt að vera með einfaldan húmor :D

2006-10-08T17:05:00.000Z

... jæja, voðalega rétt slapp þetta hjá mér ...fékk 6.1 í klínísku ...sem mér finnst ágætt miðað við lærdómsleysi (samt ekki mjög gott miðað við meðaltal úr prófinu). ...fékk svo 9 í tölfræðinni, eins og ég sagðist ætla að gera :D ...ég á nú eftir að fá tækifæri til að bæta mig í klínísku sálfræðinni, við tökum 3 hlutapróf, og tvö þeirra gilda sem 30% af einkunn ...þannig að þá er bara að fá hærra í hinum tveim prófunum.

...svo er próf á morgunn ...að vísu ekki mjög mikilvægt, en samt ágætt að sjá hvað maður getur.

2006-10-07T12:11:00.000Z

Jæja, á eru veikindin afstaðin. En þau fóru þannig að í fyrrinótt vorum við öll alveg fárveik ...ég þó minnst, þannig að ég var í þjónustuhlutverkinu. ...þetta var eins og að vinna á stóru sjúkrahúsi eða vígvelli ...segi ekki meira.

Nú! ...eins og við var að búast vegna lærdómsleysis gekk mér ekki vel í prófinu :´( ...ég verð alveg extremely happý ef ég fæ 6 ...býst samt meira við svona 5. Það er nú samt ljós punktur á þessu, það eru 3 svona hlutapróf, en aðeins tvö þeirra gilda til einkunnar ...þannig að ég hef ennþá tækifæri til að standa mig vel á hinum tveim :D
Ég giskaði líka alveg villt og galið á það sem ég vissi ekki ...sem er pínu stúpid þar sem það er dregið frá fyrir röng svör. Ég sleppti bara einni spurningu ...og giskaði á 9 (af 25) ...ekk mjög skynsamlegt þetta Ester!

...þá er bara næst að einbeita sér að því að fá 9 í tölfræðiprófinu ...hehe :)